Папа да нунцыяў: Езус жывы і звяртаецца да кожнага з нас
Мы не можам размаўляць
з Езусам так, нібыта Ён проста гістарычная постаць, таму што Ён жывы і знаходзіцца
перад намі. З такімі словамі папа Францішак звярнуўся да Апостальскіх нунцыяў, запрошаных
на супольную Эўхарыстыю ў Дом св. Марты 23 чэрвеня. У літургіі прынялі ўдзел каля
40 папскіх дыпламатычных прадстаўнікоў, якія засталіся ў Рыме пасля сустрэчы з Пантыфікам
21 чэрвеня. Сваю гамілію Папа прысвяціў разважанню над словамі Хрыста, скіраванымі
да апосталаў: “Вы кім мяне лічыце?”. Паводле Святога Айца, гэта пытанне таксама і
сёння Пан скіроўвае да кожнага з нас: “яго задае жывая асоба і мы і павінны адказаць
ад шчырага сэрца”. Папа адзначыў, што часам на пытанне Хрыста “Хто я для цябе?”, мы
саромеемся даць адказ, бо ведаем аб сваёй грахоўнасці. Але менавіта гэта той момант,
калі можна даверыцца любові Божай і адказаць як св. Пётр на беразе Тыберыяцкага возера:
“Пане, Ты ўсё ведаеш”. “Менавіта ў момант, калі адчуваем сябе грэшнікамі Бог нас вельмі
любіць і як рыбака Пятра зрабіў галавой свайго Касцёла, так і з намі зробіць цудоўныя
рэчы”, - сказаў Францішак.
Паводле Святога Айца, калі прызнаваць веліч Бога
і любіць Яго, можна атрымаць упэўненасць і адвагу, неабходную для таго, каб штодня
браць і несці крыж, нават “часам цяжкі”. “Пойдзем наперад з радасцю і просячы аб гэтай
ласцы: дай Твайму народу, Ойча, жыць у пашане і любові да Твайго святога Імя, а таксама
з упэўненасцю, што не пазбавіш апекі таго, каго ўмацоўваеш Тваёй любоўю”, - заклікаў
Францішак.