“Дзіцячы цягнік” – падарожжа да Папы праз прыгажосць
Папа Францішак накіраваўся
сёння на ватыканскую чыгуначную станцыю, каб прывітаць гасцей, якія прыбылі да яго
з Мілану, Балонні і Фларэнцыі. “Дзіцячы цягнік” выправіла ў падарожжа Папская рада
па культуры, жадаючы такім чынам дапамагчы дзецям з псіха-сацыяльнымі праблемамі знайсці
кантакт з сабой, іншымі і акружаючым светам праз дылог з прыгажосцю. Каля 300 дзяцей
і каля 160 іх апекуноў на працягу падарожжа атрымалі магчымасць удзельнічаць у развіваючых
майстар-класах, сустрэчах і забавах. Кульмінацыяй акцыі, якая прайшла ў рамках ініцыятывы
пад назвай “Падворак дзяцей”, стала канешне ж сустрэча з Пантыфікам.
Кардынал
Джанфранка Равазі прызнаўся, што ініцыятыва нарадзілася з жадання даць магчымасць
дзецям з веруючых і няверуючых сем’яў сустракацца разам. “Дзіцячы цягнік” – ініцыятыва
асаблівая, адзначыў старшыня Папскай рады па культуры, яна прысвечана адмысловай групе
дзяцей, якая не можа застацца па-за ўвагай Касцёла, якраз наадварот, павінна быць
у цэнтры яго клопату. Гэта дзеці, якія маюць за сабой складаны вопыт: няпоўныя сем’і
або сем’і, якія перажываюць рэальныя трагедыі, таму ўяўляюць сабой адну з самых драматычных
сітуацый крызісу сучаснай сям’і.
Кардынал прызнаўся, што гэта не проста кароткачасовая
акцыя. Мерапрыемства рыхтавалася праз доўгую серыю сустрэч на працягу месяцаў. Яны
праходзілі непасрэдна ў катэдрах Мілана, Балонні і Фларэнцыі, бо сабор з’яўляецца
сімвалам веры, хрысціянскай традыцыі горада. Нага большасці дзяцей, хоць яны і жывуць
у гэтых гарадах, ніколі не ступала на парог не толькі катэдры, але і храма ўвогуле.
Хоць у духу ініцыятывы “Падворак дзяцей” няма катэхізацыі як такой, усё ж яна прадугледжвае
сустрэчу са светам веры, якая з’яўляецца таксама светам прыгажосці, адзначыў ватыканскі
іерарх.
Старшыня Папскай рады па культуры прызнаўся, што Папа неадкладна прыняў
прапанову сустрэчы з дзецьмі. Ён, будучы пастырам вялікай архідыяцэзіі, заўсёды меў
добры кантакт з дзецьмі, таму, магчыма, у пэўным сэнсе, зноў вярнуўся ў сваю “пастырскую
рэчаіснасць”, але ўжо ў новым кантэксце, выказаў здагадку кардынал Равазі.