Tensione në Shqipëri ditën e zgjedhjeve parlamentare: një i vdekur në një qendër votimi
Votimet e sotme për parlamentin e ri në Shqipëri janë karakterizuar nga incidente
të ndryshme. Ngjarja më e rëndë është ajo e Laçit, ku nga të shtënat me armë pranë
një qendre votimi, mbeti një i vdekur e një i plagosur. Pas një konfrontimi, që mësohet
se ka nisur fillimisht fizikisht, e me pas me përdorimin e armës ka mbetur i vdekur
shtetasi Gjon Pjetër Gjoni, që mësohet të ketë qenë simpatizant i LSI-së. Policia
e Lezhës në një konference për mediat, ka deklaruar se nga të shtënat ka mbetur i
plagosur kandidati i PD-se, Mhill Fufi i cili ka qenë edhe objekt i sulmit, si dhe
ka mbetur i plagosur edhe një tjetër person, identifikuar si Kastriot Fufi. Drejt
vendit të ngjarjes janë drejtuar forcat Renea, ndërkohë që po hetohet për zbardhjen
e saj. Në vendin e ngjarjes janë gjetur gëzhoja të kalibrave të ndryshëm, ndërkohë
që priten të dhënë lidhur me autorësinë e ngjarjes. Prokuroria e Lezhës është
duke marrë në shqyrtim kërkesën e Policisë së Shtetit për të shpallur në kërkim 7
persona të dyshuar për ngjarjen e Laçit. Ngjarja sipas policisë Rreth
orës 08.45’, të ditës së sotme, në ambientet e jashtme të Shkollës së Mesme “AT Shtjefën
Gjeçovi”, të qytetit të Laçit, ka patur një shkëmbim zjarri, ku për pasojë: ka gjetur
vdekjen shtetasi Gjon Gjoni, vjeç 49, banues në Laç dhe po ashtu janë plagosur,
shtetasi Mhill Fufi, rreth 49 vjeç, kandidat për deputet i subjektit politik
Partia Demokratike, për Qarkun e Lezhës, i cili është dërguar për mjekim në Spitalin
e Rajonal Lezhë, jashtë rrezikut për jetën, si dhe shtetasi Kastriot Fufi, vjeç 39,
banues në Mamurras, i cili është dërguar për ndihmë më të specializuar në Spitalin
Ushtarak Tiranë. Strukturat e Policisë po punojnë intensivisht për zbardhjen e
dokumentimin e plotë ligjor të kësaj ngjarje të rëndë. Për hetimin dhe zbardhjen
e të gjitha rrethanave të kësaj ngjarje është ngritur një grup i posaçëm hetimor,
i cili kryesohet nga Prokurori i rrethit Gjyqësor Kurbin. Në përbërje të këtij grupi
të posaçëm hetimor bëjnë pjesë dhe specialistët më të mirë të kësaj fushe të Drejtorisë
së Përgjithshme të Policisë së Shtetit. Duke u ndalur mbi raportimet e vëzhguesve
në terren, Koalicioni i Vëzhguesve Vendorë deklaroi se gjatë procesit të sotshëm janë
vënë re një sërë problemesh, si hapje me vonesë e qendrave të votimit, në mënyrë të
veçantë nëpër fshatra në zona të thella të vendit, ngatërresa me vendosjen e kapakëve
të kutive, mungesa e materialeve zgjedhore, bllokim procesi nga ana e komisionerëve,
orientim votimi, një numër më i vogël fletësh votimi në raport me numrin e zgjedhësve,
votim familjar dhe janë ndeshur edhe raste votimi pa mjet identifikimi. Votimet interesojnë
mase tre milion e 200 mijë qytetarë me të drejtë vote, të cilën do të zgjedhin Parlamentin
e ri, po nga këto votime vlerësohet edhe besueshmëria e Vendit që ka për detyrë të
garantoi votime të lira, transparente dhe paqësore, nëse vërtetë do të niset udhëtimit
për aderimin në Bashkimin Evropian.