Кардынал Дзяржсакратар аб місіі ватыканскіх дыпламатаў
Святыя Пётр і Павел
з’яўляюцца прыкладамі для сучасных ватыканскіх дыпламатаў, лічыць кардынал Дзяржсакратар
Тарчызіо Бэртонэ. Ён узначаліў 22 чэрвеня Эўхарыстыю ў базыліцы св. Пятра для Апостальскіх
нунцыяў, якія прабываюць у гэтыя дні ў Рыме. Іерарах перакананы, што папскія прадстаўнікі
павінны наследаваць пакору і моц св. Пятра і энтузіязм і апостальскую руплівасць св.
Паўла. Гледзячы на двух апосталаў, можна зразумець, што корань веры і крыніца місіі
Касцёла – у сяброўстве з Хрыстом, звярнуў увагу кардынал. Ён дадаў, што дыпламатам
часта прыходзіцца працаваць ва ўмовах цяжкіх абставін, няўдач і неразумення, але яны
пакліканы пастаянна быць у распараджэнні Пана з уласнымі слабасцямі і абмежаванасцю.
Кардынал Бэртонэ заклікаў нунцыяў ніколі не “маскіраваць слабасці веры” за
дэманстрацыяй сілы, актыўнасці і інтэлекту. Ён перасцярог ад “ідалапаклонства”, якое
палягае на аддаванні пашаны “каму-небудзь або чаму-небудзь” замест Бога ці на роўні
з Ім. “Вернік пакліканы прызнаць, што толькі Бог ёсць Бог, што Ён адзін мае права
на глыбокую пашану і служэнне”, - сказаў кардынал Дзяржсакратар. Гэты выбар, адзначыў
ён, будзе стаяць перад чалавекам да канца яго дзён, а “мамона” заўсёды будзе спакушаць
сваёй ілюзорнай гарантыяй бяспекі.
Перад Апостальскім нунцыем стаіць “жыццёва
важная задача”, прадстаўляць Наступніка св. Пятра на ўзроўні Касцёлаў, нацыянальных
і міжнародных органаў, падкрэсліў кардынал Бэртонэ. Паводле яго, для эфектыўнага выканання
гэтай місіі патрыбны пакора і прастата, так непапулярныяў вачах гэтага свету.