Францішак: кандыдаты на біскупства павінны любіць беднасць і быць блізка да людзей
21 чэрвеня папа Францішак
прыняў на аўдыенцыі каля 150-ці папскіх дыпламатычных прадстаўнікоў, якія працуюць
у розных краінах свету. Звяртаючыся да іх, Пантыфік адзначыў, што не хоча “казаць
выключна фармальных словаў ці якія прынята казаць”, але тыя, якія “ляжаць” у яго на
сэрцы. Па-першае, ён звярнуў увагу на вандроўны характар жыцця прадстаўнікоў Папы.
“Вы заўсёды з чамаданам у руках”, - пажартаваў ён і дадаў, што гэта вядзе да двух
важных наступстваў: немагчымасці прывязацца да сяброў, рэчаў, месцаў, супольнасцяў,
а таксама да быцця заўсёды “пілігрымамі на зямлі”, якія здалёк бачаць тое, што ім
было абяцана, як казаў апостал Павел у сваім Пасланні да Габрэяў. Францішак заклікаў
папскіх дыпламатаў спытаць саміх сабе: на што я гляджу? Чаго шукаю у жыцці? “Даброты,
перспектывы гэтага свету, прыводзяць да расчаравання, да таго, што ніколі не будзем
задаволены; Пан – гэта дабро, якое не расчаруе”, - сказаў ён і дадаў, што блізкія
адносіны з Хрыстом павінны быць “штодзённым пасілкам папскага прадстаўніка”.
Святы
Айцец нагадаў пра небяспеку “духоўнай марнасці”, якая пагражае таксама людзям Касцёла
і заключаецца ў тым, каб ісці за духам гэтага свету, думаючы аб самарэалізацыі, а
не аб хвале Божай. Папа заклікаў памятаць, што папскія дыпламаты з’яўляюцца пастырамі,
нягледзячы на тое, што не навучаюць асобную частку Божага Народа, якая ім даверана
і не кіруюць лакальнымі Касцёламі. “Таксама ў адносінах з грамадзянскімі ўладамі і
калегамі будзьце пастырамі: заўсёды шукайце дабра, дабра ўсіх, дабра Касцёла і кожнага
чалавека”, - пажадаў Пантыфік.
Францішак закончыў свой зварот, заклікам да
дыпламатаў, больш уважліва падыходзіць да выбару кандыдатаў на атрыманне біскупскай
сакры ў краінах, у якіх яны працуюць. “Будзьце ўважлівымі, каб кандыдаты былі пастырамі
блізкімі да людзей (...), айцамі і братамі, былі пакорнымі, цярплівымі і міласэрнымі;
каб любілі беднасць, унутраную, як свабоду для Пана, а таксама знешнюю, як прастату
і строгі лад жыцця, каб не мелі псіхалогіі “валадароў”. Будзьце уважлівымі, каб яны
не былі амбіцыёзнымі (...) Каб былі здольнымі “даглядаць” давераны ім статак, клапаціцца
пра тое, што трымае яго ў адзінстве; каб “чувалі” над самімі сабой, каб мелі уваліжлівасць
да тых небяспекаў, якія ім пагражаюць; але перш за ўсё, каб мелі здольнасць “чуваць”
над статкам”, - сказаў Пантыфік.
Пантыфік прывёў прыклад св. Юзафа, які чуваў
над Марыяй і Езусам, якія яму былі давераны. Паводле Папы пастыры павінны быць напярэдадні
статку, каб указваць дарогу, пасярод статку, каб трымаць яго ў адзінстве і напрыканцы
статку, каб хтосці не застаўся па-за ім, а таксама, каб сам статак, меў неабходную
для пошуку правільнага шляху “інтуіцыю”.