Papa Roako-s: të marrë fund vuajtja në Siri e dhuna në Tokën e Shenjtë!
Thirrje e fortë për të ndihmuar popullsinë siriane, që jeton në vuajtje, si dhe refugjatët
e mërgimtarët. Papa Françesku e ngriti fort zërin në takimin me pjesëmarrësit në Asamblenë
e 86-të të Roako-së (Bashkimi i Veprave të Ndihmës për Kishat Lindore), që pikërisht
sot përfundoi punimet. Papa shprehu shqetësimin e tij të thellë edhe për gjendjen
e pasigurt e dhunën, që po ushtrohet mbi të krishterët e Tokës së Shenjtë. Pranë,
me mirënjohje: kështu i shprehu Papa Françesku ndjenjat e mbarë Kishës për anëtarët
e agjencive të Roako-s. Duke i takuar sot në Vatikan, i nxiti të mos e humbasin shpresën
përballë vështirësive dhe bëri thirrje t’i jepet fund të gjitha dhimbjeve, të gjitha
tipeve të dhunës, të diskriminimit fetar, kulturor e shoqëror. Ndeshjet, që mbjellin
vdekje, shtoi Papa, duhet t’i lënë vendin takimit e pajtimit, sepse sjell jetë. Pastaj,
nxitja për të mos e harruar Sirinë, që jeton në një mjerim të vërtetë: “Ju
kërkoj të bëni gjithçka është e mundur për të lehtësuar nevojat e mëdha të popullsive
të goditura, posaçërisht atyre siriane. Të njerëzve të dashur të Sirisë, të shpërngulurve,
refugjatëve, gjithnjë më të shumtë. Pikërisht Shën Injaci i Antiokisë u kërkonte të
krishterëve të Romës: ‘Kujtojeni në lutjen tuaj Kishën e Sirisë... Jezu Krishti nuk
do ta harrojë atë e bamirësinë tuaj! (Letër romakëve IX,I). Edhe
unë ju përsëris: ‘Kujtojeni në lutjen tuaj Kishën e Sirisë! Jezu Krishti nuk do ta
harrojë atë e lutjen tuaj’. Zotit të jetës ia besoj viktimat e shumta e i lutem Nënës
së Tij të Shenjtnueshme t’i ngushëllojë të gjithë ata, që janë në mjerim të thellë
(Ap 7,14). Vërtet vuajtje e madhe, kjo”. Por jo vetëm
Siria është në zemër të Papës. Është edhe Toka e Shenjtë, viset e shenjta, trojet
e shëlbimit tonë: “.. më përtërihet në shpirt shqetësimi i madh kishtar për
kushtet e shumë vëllezërve e motrave, që jetojnë në një situatë të pafundme pasigurie
e dhune, e cila nuk i kursen as njerëzit më të pafajshëm e më të ligshtë. Ne, besimtarëve,
na kërkohet lutje e vazhdueshme e plot besim, që Zoti të na japë hirin e paqes së
dëshiruar e të solidaritetit konkret”. Papa i kujtoi me dashuri katolikët
lindorë që, në rrjedhë shekujsh, përballuan vuajtje e mundime, për ta dëshmuar besojmën
e tyre të krishterë e për ta ruajtur fenë. E i shprehu mirënjohjen Zotit për besnikërinë
e tyre ndaj Krishtit, ndaj Ungjillit e Kishës: "Dëshiroj t’i inkurajoj e
t’i mbështes në ushtrimin e dashurisë së krishterë, e vetmja arsye krenarie për dishepujt
e Jezusit. Kjo dashuri buron nga dashuria e Hyjit në Krishtin: Kryqi është maja, shenja
e lumnueshme e mëshirës dhe e dashurisë së Zotit, që u ndikua në zemrat tona, për
virtyt të Shpirtit Shenjt (cfr Rm 5,5). Është detyrë,
vijoi Papa, t’i nxisim besimtarët për të bërë mirë, sepse dashuria e krishterë është
e pandashme nga feja. Veprimtaria jonë, vijoi, do të jetë e frytshme vetëm në se i
ka rrënjët në fe, ushqehet nga lutja, posaçërisht nga Eukaristia Shenjte, Sakrament
i fesë e i dashurisë. Në fund, ftesa për vijimin e realizimit të projekteve, që synojnë
formimin e njerëzve, posaçërisht të rinjve, duke i përgatitur për të përballuar jetën:“Mos
e harroni kurrë se këto projekte duhet të jenë shenjë e dëshmisë së dashurisë së Zotit,
që përbën identitetin e krishterë. Kisha, në larminë e pasurinë e pjesëve të saj
përbërëse e të veprimtarive të saj, nuk e gjen sigurinë në mjete njerëzore. Kisha
është e Zotit, ka besim në praninë e në veprimin e tij, sjell në botë pushtetin e
Hyjit, që është pushtet i dashurisë”.