Кангрэгацыя Божага
Культу і Дысцыпліны Сакрамэнтаў уключыла імя св. Юзафа, абранніка Найсвяцейшай Панны
Марыі, у Эўхарыстычныя малітвы трэцяга выдання Рымскага імшалу. Як гаворыцца ў спецыяльным
паведамленні з гэтай нагоды, рашэнне было прынята “пасля ўважлівага разгляду гэтага
пытання і ў сілу паўнамоцтваў, атрыманых ад Святой Айца Францішка”. Размова ідзе пра
II, III і IV Эўхарыстычныя малітвы. Імя св. Юзафа будзе прамаўляцца адразу пасля імя
Найсвяцейшай Панны Марыі.
Кангрэгацыя апублікавала лацінскі варыянт паправак,
які ад гэтага моманту будзе мець статус афіцыйнага тэксту. У II-й Эўхарыстычнай малітве
імшальны тэкст будзе гучаць так: “ut cum beáta Dei Genetríce Vírgine María, beáto
Ioseph, eius Sponso, beátis Apóstolis"; у ІІІ-й: “cum beatíssima Vírgine, Dei Genetríce,
María, cum beáto Ioseph, eius Sponso, cum beátis Apóstolis”; у IV-й: “cum beáta Vírgine,
Dei Genetríce, María, cum beáto Ioseph, eius Sponso, cum Apóstolis”.
Калі гаворка
ідзе аб перакладзе на самыя распаўсюджаныя заходнія мовы, ватыканская дыкастэрыя прадставіць
іх у найбліжэйшы час. Пераклады на іншыя мовы, у адпаведнасці з касцёльным правам,
павінны быць падрыхтаваны адпаведнымі Канферэнцыямі Біскупаў і зацверджаны Святым
Пасадам праз пасрэдніцтва Кангрэгацыі Божага Культу і Дысцыпліны Сакрамэнтаў.
Матывам
такога рашэння стала адмысловая сувязь св. Юзафа “з пачаткам таямніцы збаўлення чалавека”,
яго незвычайная пакора, “якая ў хрысціянскай веры служыць дасягненню высокіх мэтаў”,
яго звычайныя чалавечыя цноты, неабходныя, каб быць добрым і сапраўдным сведкам Хрыста.
“Дзякуючы ім св. Юзаф, клапоцячыся з любоўю пра Божую Маці і з радасцю прысвяціўшы
сябе выхаванню Езуса Хрыста, стаў апекуном самых каштоўных скарбаў Бога Айца, і адзначыўшыся
на працягу стагоддзяў культам Божага народа, падтрымліваў містычнае цела Езуса, Касцёл”,
- можна прачытаць у заяве Кангрэгацыі Божага Культу і Дысцыпліны Сакрамэнтаў.
У
дакуменце, падпісаным прэфектам ватыканскай дыкастэрыі, кардыналам Антоніа Канісарэсам
1 мая, ва ўспамін св. Юзафа Рамесніка, гаворыцца, што яшчэ Бэнэдыкт XVI падчас свайго
пантыфікату прыняў рашэнне аб уключэнні імя св. Юзафа ў Эўхарыстычныя малітвы, што
і падтрымаў нядаўна папа Францішак.
Трэба адзначыць, што падобныя рашэнні аб
змене ў тэксце галоўнай літургічнай кнігі Касцёла прымаюцца надзвычай рэдка і ў выключных
выпадках.