Dokument për dialogun katoliko-luteran: “Nga konflikti në bashkim”
“Nga konflikti në bashkim”: ky është titulli i një dokumenti për dialogun katoliko-luteran,
që u paraqit dje në Gjenevë, në praninë e kardinalit Kurt Koh, kryetar i Këshillit
Papnor për Bashkimin e të Krishterëve. Prelati u ftua në paraqitjen e ngjarjeve të
vitit 2017, me të cilat Federata Luterane Botërore do të kremtojë 500 vjetët e Reformës
së Luterit. Ndërkaq, dokumenti përshkon etapat e marrëdhënieve ndërmjet katolikëve
e luteranëve, që nga ndarja e deri tek bashkëpunimi, në udhën e përbashkët drejt bashkimit.
Të dëgjojmë përgjegjësin për këto marrëdhënie në dikasterin papnor, imzot Matthias
Turk: Është etapë vërtet e rëndësishme. Pas kaq shekuj konfliktesh e keqkuptimesh
– të cilat kanë sjellë madje edhe luftra ndërmjet kombeve e ndërmjet njerëzve brenda
një vendi, siç e dimë nga historia – ky është përvjetori i parë i Reformës, që mund
ta kremtojmë së bashku, në mënyrë ekumenike. Siç tha Martin Jung, sekretari i përgjithshëm
i Federatës Luterane Botërore, kujtimi i Reformës do të jetë ngjarje ndërkombëtare,
por duhet të ketë karakter ekumenik, për dëshminë tonë të përbashkët. Synimi
i dokumentit nuk është ta ndryshojë historinë, por ta tregojë ndryshe atë. Si mund
të arrihet kjo? Arsyet, që kanë sjellë ndarje në Kishë, shpesh bazohen mbi
keqkuptime e interpretime të ndryshme të fesë e të bindjeve teologjike. Gjatë dialogut
ekumenik ndërkombëtar, kemi ditur të rizbulojmë themelet e përbashkëta, bazat e fesë
e kemi qenë në gjendje të pohojmë se këto pika nuk janë arsye për ndarje ndërmjet
Kishave. Dokumenti i përmbledh këto hapa dhe sheh drejt së ardhmes, duke përvijuar
hapin tjetër të përbashkët. Në një shoqëri si kjo e sotmja, dëshmia e përbashkët
e të krishterëve shihet tashmë si urgjencë. Por cila udhë duhet ndjekur? Çështja
e Zotit është shumë e rëndësishme, siç pohonte me forcë Benedikti XVI, por ka edhe
çështje të tjera. Ne duhet të dëshmojmë para Zotit, Krijues e Shëlbues, para Jezu
Krishtit e Shpirtit Shenjt. Ne e njohim vetveten në këtë Trini Hyjnore e pikërisht
Ajo e ka themeluar Kishën, një të vetme, shenjte, katolike e apostolike, pra, bashkësinë
tonë të krishterë. Duhet t’i kapërcejmë ndarjet e të dëshmojmë atë, që Jezu Krishti
e ka themeluar për ne: vetëm kështu mund të binden njerëzit, sidomos në kohët e sotme. Në
dokument nënvizohet edhe rëndësia e Pentekostalëve dhe e Lëvizjeve të reja të krishtera
në udhën e pajtimit… Ne mbajmë kontakte me të gjitha denominacionet e krishtera
në nivel global e ky dokument mund të jetë teksti fillestar i çdo lloj dialogu ekumenik,
sepse flet për synimet bazë të reformave të Kishës, gjithnjë të nevojshme, e flet
edhe për marrëdhëniet tona me Zotin.