Thirrje e Papës për Sirinë, në letrën për G8-ën. Paratë duhet të shërbejnë, jo të
qeverisin
Mbledhja e G8-ës të punojë për armëpushimin e menjëhershëm në Siri dhe për fillimin
e bisedimeve ndërmjet palëve: kështu shkruan Papa Françesku në një letër, me të cilën
i përgjigjet kryeministrit britanik David Kamerun. Ky i fundit, president i turnit
i G8-ës, që filloi sot e do të përfundojë nesër në Irlandën e Veriut, i pati shkruar
më 5 qershor. Në letrën e tij, Kamerun paraqiste përparësitë e presidencës britanike
të G8-ës për vitin 2013, të cilat kanë të bëjnë kryesisht me tregun e lirë ndërkombëtar,
transparencën e qeverive dhe të protagonistëve të ekonomisë. Thirrja e Papës argjentinas
u drejtohet të mëdhenjve të botës, që t’i kthejnë sytë nga Lindja e Mesme, e sidomos
nga Siria, duke mos menduar thjesht si të ndalojnë luftën, por si të ndërtojnë paqen.
Ky është kusht i domosdoshëm për mbrojtjen e grave, të fëmijëve e të viktimave të
tjera të pafajshme, është premisë për zhdukjen e urisë, nënvizon Ati i Shenjtë. Veprimtaria
politike dhe ekonomike, shton Papa, duhet të ketë në qendër njeriun, pasi qëllimi
i saj është t’u shërbejë njerëzve, duke filluar nga më të varfërit e më të brishtët.
Politika dhe ekonomia, thekson Papa Bergolio në letrën për G8-ën, “nga njëra anë,
duhet të lejojnë shprehjen më të lartë të lirisë e të krijimtarisë individuale e kolektive
dhe, nga ana tjetër, duhet të garantojnë përdorimin e tyre me përgjegjësi e solidaritet,
duke u kujdesur veçanërisht për më të varfërit”. Pastaj, Papa ndalet në nevojën
e zhdukjes së urisë e në sigurimin e ushqimit, duke kujtuar se mirëqënia materiale
e shpirtërore e njeriut duhet të jetë pikënisja e çdo zgjidhjeje politike dhe ekonomike.
Njëkohësisht, ajo është masa për të kuptuar sa të frytshme dhe etike janë vendimet
e marra. Kriza aktuale botërore tregon se etika nuk mund të ndahet nga ekonomia, është
pjesë e saj. Prandaj, shton Ati i Shenjtë, çdo masë, si ato për të zgjidhur problemet
urgjente, ashtu edhe masat afatgjata, duhen marrë duke pasur parasysh etikën e së
vërtetës. “Paraja e mjetet e tjera duhet të shërbejnë e jo të qeverisin – e mbyll
letrën Papa Françesku – solidariteti falas e pa interes është çelësi për funksionimin
e mirë të ekonomisë globale”.