Святы Айцец: прынцып лаіцызму не азначае варожасці да рэлігійнай рэальнасці
Святы Айцец прыняў
15 чэрвеня Групу сяброўства паміж Францыяй і Святым Пасадам, у якую ўваходзяць члены
Сената і Нацыянальнага сходу Французскай Рэспублікі. Папа адзначыў, што нягледзячы
на “розныя палітычныя пачуцці” прысутных, іх аб’ядноўвае жаданне павышаць “якасць
адносін” паміж Францыяй і Апостальскай Сталіцай. Асабіста для Пантыфіка гэта сустрэча
стала магчымасцю “падкрэсліць адносіны даверу”, якія “у цэлым” існуюць у Францыі паміж
адказнымі за грамадскае жыццё і Каталіцкім Касцёлам, як на нацыянальным, так і на
рэгіянальным і мясцовым узроўнях. “Прынцып лаіцызму, які рэгулюе адносіны паміж французскай
дзяржавай і шматлікімі рэлігійнымі канфесіямі сам па сабе не азначае варожасці да
рэлігійнай рэальнасці, або выключэння рэлігіі з грамадскага поля і дэбатаў, якія ажыўляюць
яго”, - адзначыў Святы Айцец.
На думку Пантыфіка, “можна радавацца таму”,
што французскае грамадства адкрывае сябе на прапановы Касцёла, якія заключаюць у сябе
пэўнае бачанне чалавека і яго годнасці, улічваючы агульнае дабро. Касцёл, нагадаў
ён, хоча прапанаваць свой адмысловы ўклад у разуменне глыбокіх пытанняў, якія датычаць
больш поўнага ўяўлення пра чалавека і грамадства і іх лёсы. І гэты ўклад датычыць
не толькі антрапалагічнай або сацыяльнай сфер, але і палітычнай, эканамічнай і культурнай,
адзначыў Папа.
Францішак заклікаў французскіх парламентарыяў “спрыяць эфектыўнаму
і ўстойліваму паляпшэнню жыцця суграмадзян”, на тэхнічным і юрыдычным узроўнях, аде
ў той жа час, не выключаючы духоўнай складаючай, якая надае кожнай ідэі неабходную
якасць, звязаную з высакароднасцю асобы.
Пантыфік падзякаваў Групе сяброўства
паміж Францыяй і Святым Пасадам за яе місію і пажадаў заўсёды клапаціцца пра карысць
чалавека і садзейнічаць духу брацтва ў Францыі.