Пантыфік да журналістаў: залечваць рану падзелу паміж Евангеллем і культурай
Дыялог, праніклівасць
і мяжа – на гэтых трох элементах засяродзіў увагу супрацоўнікаў і аўтараў каталіцкага
часопіса “La Civiltà Cattolica” папа Францішак. 14 чэрвеня адбылася сустрэча Пантыфіка
з журналістамі. Святы Айцец заклікаў іх “быць цвёрдымі перад абліччам крывадушнасці”
і ў той жа час “не ствараць бар’ераў”. “Ваша галоўная задача – будаваць не муры, а
масты, весці дыялог з усімі людзьмі, уключаючы тых, якія не падзяляюць хрысціянскай
веры, але маюць культ іншых чалавечых каштоўнасцяў, і тых, якія супрацьстаяць Касцёлу
і пераследуюць яго розным чынам”, - сказаў Францішак. Папа адзначыў, што каштоўнай
для дыялога з’яўляецца здольнасць пранікаць у глыбіню рэчаў. Ён нагадаў пра праніклівасць
езуіцкай духоўнасці, якая дазваляе з “пакорнай і адкрытай разважлівасцю” шукаць і
знаходзіць Бога і прысутнасць Святога Духа ў чалавечай і культурнай рэальнасці.
Пантыфік
заклікаў аўтараў часопіса быць “людзьмі памежжа”, якія “залечваюць” рану падзелу паміж
Евангеллем і культурай. “Існуе патрэба ў тым, каб адважна вучыць моцнай і сталай веры,
здольнай надаць сэнс жыццю і даць пераканаўчыя адказы тым, хто шукае Бога”, - сказаў
Папа.
Выданне “La Civiltà Cattolica”, адно з самых аўтарытэтных і чытаных
у Італіі, было заснавана ў 1850 г. і да сённяшняга дня кіруецца айцамі езуітамі.