Mbretëria e Bashkuar. Kardinali Toran: mëshira, vlerë e përbashkët e kristianizmit
e hinduizmit.
Hinduizmi dhe krishterimi kanë një thesar me vlera të përbashkëta, ndërmjet të cilave,
dhembshuria e mëshira mund të jenë nga më të rëndësishmet. Këtë pohoi kardinali Zhan
Lui Toran, duke vizituar Tempullin e parë tradicional Hindu në Evropë, Baps Shri Swaminarayan
Mandir, që ngrihet në Neasden, në veri të Londrës. Kardinali Zhan-Lui Toran, kryetar
i dikasterit papnor për Dialogun Ndërfetar, vijon vizitën në Mbretërinë e Bashkuar,
për të forcuar marrëdhëniet e mira ndërfetare në këtë vend e për të treguar se miqësia
ndërmjet feve është parakusht për sigurimin e paqes, siç u shpreh Papa Benedikti XVI
në fjalimin drejtuar Kuries Romake për Krishtlindjen 2012. Gjatë vizitës, kryesisht
në Londër e Birmingam, Hirësia e tij po takohet me bashkësitë Sikh, Xhiainiste e Hinduiste
në vend e po viziton qendrat kryesore të kultit. Takimi i sotëm u përqendrua mbi temën:
“Katolikë e hinduistë; rëndësia e përhershme dhe praktika e dhembshurisë”. Në një
ças krize shoqërore dhe ekonomike, si ky që po kalojmë, pohoi kardinali Toran, të
mendosh për konceptin e dhembshurisë, ka një rëndësi të dorës së parë, sepse duhet
rizbuluar vlera e mëshirës në jetën personale e kolektive, si mjet për ruajtjen dhe
promovimin e paqes. Dhembshuria, kur shndërrohet në interes aktiv për vuajtjen e të
tjerëve, mund të quhet mëshirë, ndjenjë, që zë kryet e vendit në fenë e krishterë
e që Papa Françesku po e thekson vazhdimisht në fjalimet e homelitë. Duke kujtuar
Mahatma Gandin, kardinali Toran nënvizoi se dhembshuria gjen shprehjen e vet më të
natyrshme në praktikën e mospërdorimit të dhunës, nga e cila Gandi u frymëzua gjatë
gjithë jetës së tij. Kardinali Toran theksoi edhe se dialogu ndërfetar duhet
t’i shërbejë njohjes dhe respektit reciprok të traditave të ndryshme fetare, që të
krijojë, kështu, për të gjithë, kushtet e një jete në paqe e liri. Më pas Kardinali
Toran mori pjesë edhe në takimin ndërfetar të lutjes, titulluar “Së bashku, në lutje
për paqen”, që u kremtua në Katedralen e Uestminsterit. I pranishëm, ndërmjet tjerëve,
edhe Nunci Apostolik në Mbretërinë e Bashkuar, kryeipeshkvi Antonio Menini. Vizita
do të përfundojë me Meshën, kryesuar nga kardinali Toran, në Katedralen londineze
të Uestminsterit, të dielën e ardhshme.