Çelësi i fjalëve të Kishës: kushtetuta "Dei Verbum"
Në vazhdën e emisioneve kushtuar Koncilit II të Vatikanit, vazhdojmë t’ju njohim me
kushtetutat, që dolën prej tij. Ato janë katër e tashmë, ju kemi folur për “Gaudium
et Spes” (Gëzimi e Shpresa) dhe për “Lumen Gentium”, që do të thotë “Drita e Popujve”.
Sot, do t’ju paraqesim kushtetutën konciliare “Dei Verbum” – Fjala e Zotit,
e cila ka të bëjë me Zbulesën Hyjnore dhe me Shkrimin Shenjt. Sipas ndokujt prej
etërve konciliarë, kjo kushtetutë është themeli, baza e dokumenteve të Koncilit II
të Vatikanit. U miratua nga asembleja e ipeshkvijve me 2.344 vota pro e 6 kundër e
më pas, u nënshkrua nga Papa Pali VI më 18 nëntor 1965. Zotit, që u zbulua përmes
Birit të Tij, duhet t’i bindemi me fe – shkruhet në kapitullin e 5-të të “Dei Verbum”
– prandaj e lëshojmë krejtësisht veten në dorë të Tij. Për këtë nevojitet hiri e ndihma
e Shpirtit Shenjt. Zoti mund të njihet përmes arsyes e përmes sendeve të krijuara
prej Tij. Zbulesa e Hyjit është shkruar dhe i është përçuar apostujve e kjo Traditë
apostolike vazhdon në Kishë me ndihmën e Shpirtit Shenjt. Magjisteri i Kishës, vazhdon
kushtetuta, ka për detyrë ta interpretojë Fjalën e Zotit e besimtarët duhet të kenë
mundësinë për ta njohur, lexuar e medituar Shkrimin Shenjt. Deri në Koncilin II
të Vatikanit, ishin të paktë, besimtarët që mund ta kuptonin Shkrimin Shenjt dhe liturgjinë,
e cila lexohej e kremtohej në latinisht. Përdorimi i gjuhës kombëtare të çdo populli
– reformë konciliare kjo – u dha të gjithëve mundësinë për ta dëgjuar Shkrimin Shenjt
në gjuhën e tyre. Dikush e interpretoi këtë reformë si hap bashkohor, dikush si lëshim
para botës moderne në dëm të Traditës e të përmbajtjes së Fjalës së Zotit, por Kisha
Katolike, përmes Papëve dhe mendimtarëve të vet, ka theksuar gjithnjë se kumtimi i
Ungjillit në gjuhën amtare nuk do të thotë të interpretohet ai lirisht e sipas dëshirës.
Tradita dhe Mësimet e Kishës vazhdojnë të jenë pika e vetme e referimit për të vërtetat
e fesë. Çdo besimtar i vërtetë e di se vetëm aty mund të gjejë elementet për kuptimin
dhe interpretimin e drejtë të Ungjillit të Krishtit.