“Хрысціянскія арабскія
СМІ на службе справядлівасці, міру і правоў чалавека” – пад такой назвай 10-11 чэрвеня
ў сталіцы Іарданіі Амане праходзіць форум арганізаваны Папскай радай па сродках масавай
камунікацыі і мясцовым Каталіцкім медыя-цэнтрам. Сярод удзельнікаў мерапрыемства прадстаўнікі
ўладаў, медыйныя эксперты розных веравызнанняў, біскупы, святары і свецкія вернікі.
У ім прымаюць удзел таксама Іерусалімскі Патрыярх Фуад Тваль і арцыбіскуп Клаўдыё
Марыя Чэллі, старшыня Папскай рады па сродках масавай камунікацыі.
У інтэрв’ю
Ватыканскаму радыё, апошні адзначыў, што выкарыстанне СМІ з’яўляецца важным фактарам
для “пабудовы мастоў” у многіх рэгіёнах свету, асабліва на Блізкім Усходзе, багатым
этнічнымі і рэлігійнымі адметнасцямі. Арцыбіскуп Чэллі звярнуў асаблівую увагу на
тое, што медыя, у Касцёле служаць не толькі каб перадаваць навіны, але таксама, каб
ствараць супольнасць. Аб’ядноўваючым фактарам, у гэтым кантэксце, з’яўляецца неабходнасць
абвяшчэння Хрыста, пераўзыходзячы абрадавыя ці традыцыйныя адметнасці.
Арцыбіскуп
Чэллі адзначыў, што пры абвяшчэнні Евангелля, Касцёл перш за ўсё, павіннен быць самім
сабой, але ў той жа час, адкрытым на “праўду іншых” ці нават рэлігію іншых людзей.
“Мы павінны ведаць, што прыналежам Езусу Хрысту, што з’яўляецца адным з Ім, але адначасова
менавіта ў Хрысце, павінны быць адкрытымі на ўсіх”, - сказаў ватыканскі іерарх. Ён
нагадаў пра заклік папы Францішка да стварэння “культуры сяброўства” і “культуры сустрэчы”.
“Гэта значыць, што Касцёл не павінен быць засяроджаным на самім сябе ці ў самім сябе
(...) але Касцёлам, які адкрываецца, Касцёлам, які здольны весці дыялог са светам”,
- сказаў арцыбіскуп Чэллі.