Telefonatë e Papës shtegtarëve nga Maçerata - në Loreto; rëndësi ka ta takojmë Jezusin
në udhën e jetës!
Mijëra të rinj arritën sot paradite në Loreto, pasi qenë nisur në këmbë nga Maçerata,
ku të shtunën u mblodhën pjesëmarrësit e shtegtimit të 35-të, organizuar nga Lëvizja
Bashkim e Çlirim, me temë: “Si mund ta shuajmë me të vërtetë etjen e shpirtit të
njeriut për jetë?”. Këtu i dëgjuan fjalët e Papës, që u lidh telefonikisht me imzot
Xhankarlo Veçerikën, ipeshkëv i Fabiano-Matelikës, organizator i shtegtimit, duke
theksuar: “E gjithë jeta është shtegtim. Në këtë udhë të jetës ka rëndësi
takimi me Jezusin, takimi me Të, e kjo të jep besim, sepse është pikërisht Ai, që
ta jep”. E akoma: “Edhe ju mund të mbështeteni mbi Jezusin, mbi
këtë prani kaq mahnitëse, kaq tërheqëse. Kur ta ndjeni veten të lodhur e të tundoheni
për të ecur sipas dëshirës, mendojeni këtë. Përsëriteni ‘po’-në tuaj e lutuni, që
secili nga ju të mund ta provojë në korpin e vet të plagosur, e në shpirt, sa nevojë
ka njerëzimi për Krishtin, i vetmi, që mund ta shuajë etjen njerëzore për jetë të
vërtetë”.Shtegtarët, ngarkuar me këto fjalë, ngarkuar me zërin e Atit të Shenjtë,
u vunë për udhë, duke provuar konkretisht atë etje, për të cilën u foli Papa Françesku.