2013-06-08 12:36:14

Էրտողան Ցուցարարներէն Կը Պահանջէ Անմիջապէս Վերջ Տալ Ցոյցերուն


Թուրքիոյ վարչապետ Ռեճեփ Թայիփ Էրտողան Մարոք, Ալճերիա եւ Թունուզ կատարուած շրջապտոյտէն իր վերադարձէն անմիջապէս ետք պահանջեց «անմիջապէս վերջ տալ ցոյցերուն, որոնք իրենց ժողովրդավարական բնոյթը կորսնցուցին եւ վերածուեցան խափանարարութեան»:
Ան Պոլսոյ «Աթաթիւրք» օդակայանին մէջ զինք դիմաւորելու եկած հազարաւոր համակիրներուն շնորհակալութիւն յայտնեց իրենց հանդարտութեան համար եւ զանոնք հրաւիրեց «տուն վերադառնալու»:
Էրտողան նշեց, որ ինք 76 միլիոն թուրք քաղաքացիներու կը ծառայէ առանց խտրութեան: «Չենք կրնար աչք խփել օրինազանցութեանը անոնց, որոնք մեր քաղաքներն ու պետական կալուածները կը քանդեն եւ մարդոց վնաս կը պատճառեն»:
Ան ողջունեց ոստիկանութիւնը, «որ մեր ապահովութիւնը պահպանելու համար իր գործը կը կատարէ: Անիկա ահաբեկիչներուն, անիշխանականներուն եւ խափանարարներուն դէմ պատնէշ է»:







All the contents on this site are copyrighted ©.