Ցուցարարներու Խմբակ Մը Թուրքիոյ Կառավարութեան Պահանջներ Ներկայացուց

Թուրքիոյ փոխվարչապետ Պիւլենթ Առընչ երէկ հանդիպում ունեցաւ ինքզինք Թաքսիմի զօրակցութեան բեմահարթակ կոչող խմբակի մը հետ, որ իրեն փոխանցեց պահանջներու ցանկ մը, որ կը բովանդակէր վեց կէտեր. 1) Կեզի այգին պէտք է շարունակէ մնալ այգի եւ անոր մէջ շինարարութիւնը պէտք է արգիլուի, 2) «Աթաթիւրք» մշակութային կեդրոնը պէտք չէ քանդուի, 3) բռնարարքները մագլցումի մղած ոստիկանները պէտք է հետաքննութեան ենթարկուին եւ պաշտօնազրկուին, 4) արցունքաբեր ռումբերու օգտագործումը պէտք է արգիլուի, 5) ձերբակալուած բոլոր ցուցարարները պէտք է առանց նախապայմաններու ազատ արձակուին, 6) խօսքի ազատութեան բոլոր արգելքները պէտք է ջնջուին:
Խմբակը հանդիպումէն ետք յայտարարեց, որ «կառավարութեան առնելիք քայլերը պիտի ճշդեն դէպքերու ընթացքը»: Անոնք մերժեցին Արընչի ներումի հայցը` նշելով, որ անոր խօսքերը «քաղաքացիական պատերազմ կը յիշեցնեն»:
Երէկ հազարաւոր աշխատաւորներ միացան վարչապետ Ռեճեփ Թայիփ Էրտողանի հրաժարականը պահանջող ցոյցերուն: Անոնք թմբուկներ զարնելով եւ պաստառներ բարձրացուցած քայլարշաւ մը կատարեցին դէպի Թաքսիմի հրապարակ: Անգարայի մէջ նոյնպիսի քայլարշաւներ կատարեցին բժիշկները, ուսուցիչներն ու դրամատուներու պաշտօնեաները: