Karrierizmi është si gërbula, bëhuni njerëz të lirë brenda: kështu Papa Françesku,
diplomatëve të ardhshëm të Selisë së Shenjtë
Papa Françesku u dha sot diplomatëve të ardhshëm të Selisë së Shenjtë një leksion
të vërtetë për lirinë, që duhet të karakterizojë shërbimin e tyre, larg karrierizmit
e marrëveshjeve nën rrogoz, që janë të pranishme edhe në Kishë. Rasti qe takimi në
Vatikan me meshtarët e rinj, që studiojnë në Akademinë Kishtare, e cila përgatit diplomatët
e nuncët apostolikë. Duke u folur me përzemërsi, por edhe me vendosmëri, Papa Bergolio
theksoi: “Të jesh i lirë, para së gjithash, do të thotë të jesh i lirë nga planet
vetjake: nga disa prej mënyrave konkrete, me të cilat, ndoshta, një ditë, keni menduar
ta jetoni meshtarinë, nga mundësia për të programuar të ardhmen, nga perspektiva për
të qëndruar gjatë në vendin e veprimit tuaj baritor. Të jesh njeri i lirë do të thotë
të bëhesh, në një farë mënyre, i lirë edhe nga kultura e nga mendësia prej së cilës
vini, jo për ta harruar e as për ta mohuar, por për t’ia hapur mendjen me dashuri
kuptimit të kulturave të tjera e takimit me njerëz, që i përkasin një bote, edhe shumë
larg suajës”. Duhet të zhvisheni nga ambiciet vetjake, vazhdoi t’u thotë Papa
meshtarëve, pasi ato i bëjnë keq Kishës. Duhet të punoni jo për lavdinë tuaj, por
për Ungjillin e për plotësimin e misionit, që do t’ju besohet. Prandaj, u shpjegoi
Ati i Shenjtë aspirantëve diplomatë, duhet të jeni gati ta ndërthurni këndvështrimin
tuaj personal mbi Kishën, çdo ide apo gjykim, me horizontin e Shën Pjetrit, që përqafon
krejt botën, sidomos ato vende, shpesh të harruara, ku Kisha e njerëzimi kanë më shumë
nevojë. Leksion jo vetëm për diplomatët e Selisë së Shenjtë, por për çdo diplomat,
që ka për zemër vendin e popullin e vet, ky i Papës argjentinas, i cili citoi dy paraardhësit
e tij, Benediktin XVI e Gjonin XXIII. Sidomos ky i fundit, para se të bëhej Papë,
qe për një kohë të gjatë, nunc apostolik në Turqi. Pikërisht, duke kujtuar veprimtarinë
e Gjonit XXIII, si Përfaqësues papnor, Ati i Shenjtë, Françesku, i këshilloi kështu
studentët: “Të dashur miq, kujdesuni jashtëzakonisht për jetën tuaj shpirtërore,
burimi i lirisë së brendshme. Pa lutje, nuk ka liri brenda vetes. Mjetet për t’i përngjarë
Krishtit, tipike të përshpirtërisë meshtarake, mund të bëhen thesar i çmuar, nëse
luteni e nëse e ktheni punën e përditshme në palestër për shenjtërimin e jetës”. Duke
folur herë me letër e herë jo, Papa Françesku u tha diplomatëve të ardhshëm të ecin
gjithnjë në udhën e shenjtërimit, pasi kur në Nunciaturë është dikush – sekretar,
apo nunc – që nuk ecën në këtë udhë, por merr sjelljet e kësaj bote, bëhet qesharak,
të gjithë tallen me të: “Ju lutem, mos u bëni qesharakë: o shenjtorë, o kthehuni
në dioqezë e bëni famullitarin, por mos u bëni qesharakë në udhën tuaj diplomatike,
në jetën diplomatike, ku ekziston rreziku i madh të ktheheni në materialistë… Të jetosh
në shërbim të Pasardhësit të Pjetrit e të Kishave, ku do të dërgoheni, mund të duket
e vështirë, por do t’ju japë mundësinë, si të thuash, të qëndroni e të merrni frymë
në zemër të Kishës, të katolicitetit të saj. E kjo është dhuratë e veçantë”. Së
fundi, Papa Françesku nuk harroi të falenderojë murgeshat e personelin laik, që punon
në Akademinë Kishtare, duke i uruar edhe një herë meshtarët studentë ta mendojnë shërbimin
e tyre për Selinë e Shenjtë, sipas shembullit të Gjonit XXIII nën mbrojtjen e Zojës
e të Pajtorit të tyre, Shna’Ndout Abat.