Միացեալ Նահանգներ Որեւէ Վերջնական Ժամկէտ Չճշդեցին Սուրիոյ Շուրջ Նախատեսուած «Ժընեւ-2 Միջազգային Խորհրդաժողովին

Միացեալ Նահանգներու արտաքին գործոց նախարարութեան բանբեր Ճէյն Փսաքի յայտարարեց, որ «Միացեալ Նահանգներ որեւէ վերջնական ժամկէտ չճշդեցին Սուրիոյ շուրջ նախատեսուած «Ժընեւ-2» միջազգային խորհրդաժողովին, որուն շուրջ համաձայնութիւն գոյացուցին Ռուսիոյ եւ Միացեալ Նահանգներու արտաքին գործոց նախարարներ Սերկէյ Լաւրովն ու Ճոն Քերրին»:
Փսաքի յայտնեց, որ «ներկայիս դժուար է որեւէ թուական ճշդել եւ պէտք է աշխատանք տանիլ խորհրդաժողովի օրակարգին վրայ»` նշելով, որ «նոյնիսկ երբ կը փափաքինք, որ խորհրդաժողովը ըստ կարելւոյն շուտ տեղի ունենայ, մեզի համար վերջնական ժամկէտէն աւելի կարեւորը այն վստահութիւնն է, թէ խորհրդաժողովին համար ամէն բան պատրաստ է, եւ այդ մէկը կը ներառէ սուրիական ընդդիմութեան ներկայացուցիչներուն ճշդումը եւ Ռուսիոյ ու ՄԱԿ-ի հետ աշխատելով օրակարգն ու խորհրդաժողովի ընթացքին տեղի ունենալիքը ճշդելը»` նշելով, որ «այդ բոլորը ժամանակ կը պահանջեն»:
Փսաքի յայտարարեց, որ Միացեալ Նահանգներու արտաքին գործոց փոխնախարար Ուինտի Շըրմըն եւ նախարարի օգնական Էլիզապեթ Ճոնզ Ժընեւ պիտի ուղղուին ռուս եւ ՄԱԿ-էն պաշտօնատարներու հետ «Ժընեւ-2»-ի պատրաստութեան շուրջ խորհրդակցութեանց մասնակցելու համար:
«Նշեալ պաշտօնատարները վաղը` չորեքշաբթի, 5 յունիսին պիտի մեկնին աշխատանքը շարունակելու եւ յառաջընթաց արձանագրելու համար ռուս եւ ՄԱԿ-էն պաշտօնատարներու հետ հանդիպումներ ունենալու», նշեց ան:
Նշենք, որ Ռուսիոյ արտաքին գործոց նախարարութիւնը նախապէս հաղորդած էր, որ այսօր նախատեսուած հանդիպումին ընթացքին ռուսական կողմի ներկայացուցիչներն են Ռուսիոյ արտաքին գործոց փոխնախարարներ Կենատի Կաթիլով եւ Միխայիլ Պոկտանով: