"Kisha nuk e braktis popullin sirian": kështu, Papa Françesku, në takimin me organizmat
katolike bamirëse, që veprojnë në Siri
Të dashur miq Ju falenderoj për të këtë takim e për krejt veprimtarinë humanitare
në Siri e në vendet fqinjë, në ndihmë të popullsive, viktima të konfilktit aktual.
E kam nxitur unë vetë Këshillin Papnor “Cor Unum” të organizojë këtë mbledhje koordinimi
për veprimtaritë e organizmave bamirëse katolike në rajon. Falenderoj kardinalin Sarah
për përshëndetjen. U uroj mirëseardhjen atyre, që vijnë nga Lindja e Mesme, në veçanti,
atyre, që përfaqësojnë Kishën në Siri. Është i njohur shqetësimi i Selisë së Shenjtë
për krizën siriane e, në mënyrë të veçantë, për popullsinë, shpesh të pambrojtur,
që vuan pasojat e konfliktit. Benedikti XVI pati kërkuar vazhdimisht të ulen armët
e të gjendet një zgjidhje me dialog për të arritur pajtimin e vërtetë ndërmjet palëve.
Përveç kësaj, ai deshi të shprehë afërsinë e tij personale, nëntorin e kaluar, kur
dërgoi kardinalin Sarah në ato zona, duke e shoqëruar gjestin me kërkesën “për të
mos i kursyer përpjekjet në kërkim të paqes” e duke shfaqur impenjimin e tij konkret
e atëror me një ofertë, në të cilën kontribuan edhe Etërit Sinodalë, tetorin e kaluar. Edhe
unë personalisht e kam fort për zemër fatin e popullsisë siriane. Ditën e Pashkëve
bëra thirrje për paqe “sidomos në Sirinë e dashur, për popullsinë e plagosur nga konflikti
e për refugjatët e shumtë, që presin ndihmë e ngushëllim. Sa gjak është derdhur! Sa
vuajtje duhet të shkaktohen akoma, para se të arrihet zgjidhja politike e krizës?”. Para
vazhdimit të dhunës e të abuzimeve rinovoj me forcë thirrjen time për paqen. Gjatë
javëve të fundit, bazshkësia ndërkombëtare ka theksuar synimin për të promovuar nisma
konkrete drejt dialogut të frytshëm, më qëllim që t’i jepet fund luftës. Janë përpjekje
që duhen përkrahur, shpresojmë të çojnë drejt paqes. Kisha e ndjen se duhet të japë
një dëshmi të përvuajtur, por konkrete e të frytshme, të bamirësisë e të dashurisë,
që ka mësuar nga Krishti, Samaritani i Mirë. E dimë se kur ndokush vuan, Krishti është
me të. Nuk mund të tërhiqemi pikërisht para gjendjeve ku dhimbja është më e madhe!
Prania juaj në mbledhjen e koordinimit tregon vullnetin për të vazhduar me besnikëri
veprën e çmuar të ndihmës humanitare, në Siri e në vendet fqinjë, që me bujari strehojnë
të ikurit nga lufta. Vepra juaj duhet të jetë e shpejtë dhe e koordinuar, shprehje
e atij bashkimi, që është dëshmi më vete, siç këshilloi Sinodi për Lindjen e Mesme.
Përveç gjetjes së zgjidhjes së konfliktit me bisedime, bashkësisë ndërkombëtare i
kërkoj të favorizojë ndihmën humanitare për refugjatët dhe të shpërngulurit sirianë,
duke synuar kryesisht të mirën e njeriut dhe mbrojtjen e dinjitetit të tij. Për Selinë
e Shenjtë, vepra e Agjencive bamirëse katolike është jashtëzakonisht domethënëse:
të ndihmosh popullsinë siriane, pa dallim etnie e feje, është mënyra më e drejtë për
të dhënë një kontribut në paqtimin e ndërtimin e një shoqërie gjithëpërfshirëse. Këtu
synon edhe përpjekja e Selisë së Shenjtë: të ndërtohet një e ardhme në paqe për Sirinë,
ku të gjithë të jetojnë të lirë e t’i shprehin lirisht veçoritë e tyre. Mendimi
i Papës, në këtë çast, shkon në bashkësitë e krishtera, që banojnë në Siri e në krejt
Lindjen e Mesme. Kisha mbështet ato gjymtyrë të saj, që sot, ndodhen veçanërisht në
vështirësi. Ato kanë detyrën e rëndësishme ta bëjnë të pranishëm krishterimin në rajonin,
ku ka lindur. E është detyrë e jona të favorizojmë vazhdimin e kësaj dëshmie. Pjesëmarrja
e gjithë bashkësisë së krishterë në këtë vepër të madhe asistence e ndihme është domosdoshmëri
e momentit aktual. Ju falenderoj akoma për këtë nismë e lutem që Hyji t’i japë
bekimin hyjnor secilit prej jush, por edhe besimtarëve të dashur, që jetojnë në Siri
e të gjithë sirianëve, aktualisht, të detyruar të largohen nga shtëpitë e tyre për
shkak të luftës. Ju, këtu të pranishëm, qofshi mjet për t’i thënë popullit të dashur
sirian dhe atij të Lindjes së Mesme se Papa i ndjek dhe u qëndron pranë. Kisha nuk
i braktis!