OKB-ja denoncon se në Siri përdoren armë kimike, pasi njihet tashmë akuza e saj kundër
regjimit të Bashar Al Asadit, për krime lufte e kundër njerëzimit. SHBA-të tregohen
të kujdesshëm e presin prova të tjera, ndërsa Franca deklaron se kundër popullsisë
siriane është përdorur gazi sarin. Ndërsa ushtria qeveritare njofton se ka marrë në
dorë rajonin e Kusairit, gjendja humanitare rëndohet. Opozita flet për rreth 1000
të plagosur, 400 prej të cilëve, rëndë, bllokuar në qytet. I kërkon Libanit të hapë
një korridor humanitar, por Bejruti ka problemet e veta. Në Tarabulluz, dy vetë kanë
humbur jetën dje në ndeshjet ndërmjet përkrahësve të regjimit sirian e atyre të opozitës. Sot,
në Gjenevë u takuan përfaqësues të Rusisë, SHBA-ve dhe OKB-së për të diskutuar mbi
përgatitjet për konferencën ndërkombëtare të paqes për Sirinë. Presidenti rus, Vladimir
Putin deklaroi këto ditë se është thellësisht i shqetësuar për diplomatët e vet, që
do të ulen në një tryezë me “kanibalët” e opozitës siriane. Iu referua qartë rastit
të një rebeli, që hëngri zemrën e një ushtari të vrarë.