Լիբանան։ Պապ Թըպպանէի Եւ Ժապալ Մըհսենի Միջեւ Բախումներ
Պապ Թըպպանէի եւ Ժապալ Մըհսենի միջեւ երէկ զինեալ բախումները շարունակուեցան` հնձելով
6 զոհեր եւ վիրաւորելով աւելի քան 30 ուրիշներ: Մալլուլէի մօտակայքը ներքին ապահովութեան
ուժերու երկու զինուորներ` Շարպել Մատի եւ Էլի Սլէյման եւս թիրախ դարձան արձակազինութեան
եւ վիրաւորուելով փոխադրուեցան հիւանդանոց. անոնցմէ մէկը ծանրօրէն վիրաւորուած է: Բանակին
շարքերուն մէջ դարձեալ արձանագրուեցան վիրաւորներ: Երեկոյեան բանակի հրամանատարութիւնը
յայտնեց, որ բանակի 5 այլ անդամներ եւս վիրաւորուած են Ապու Ալի հրապարակին վրայ, երբ
նռնականետ մը թիրախ դարձուցած է անոնց մօտ գտնուող ինքնաշարժ մը: Բանակը, որ ամբողջ
օրուան ընթացքին կը փորձէր հանդարտեցնել երկու կողմերը, երեկոյեան սկսաւ ուղղակի թիրախ
դարձնել զանոնք: Զինեալ բախումները հիմնականին մէջ կեդրոնացան Թըպպանէի, Մալլուլէի,
Մանքուպինի, Զահիրիէի, Ռիվայի եւ Պաքքարի շրջաններուն մէջ: Պապ Թըպպանէի բնակիչ զինեալներ
ձեռնառումբեր նետեցին այն վաճառատուներուն վրայ, որոնց սեփականատէրերը Ժապալ Մըհսենի
բնակիչներ են: Ի բացառութիւն նախկին իրավիճակին, քաղաքական ոչ մէկ նախաձեռնութիւն
արձանագրուեցաւ Թրիփոլիի մէջ: