Իրանի Մէջ Ահաբեկչական Ցանց Մը Ձերբակալուած
է
Իրանի ապահովութեան նախարարութիւնը յայտարարեց, որ ձերբակալուած է «ահաբեկչական ցանց
մը, որ ծրագրած էր Յունիս 14-ին նախատեսուած նախագահական ընտրութեան ընթացքին խափանարարական
արարքներ կատարել»: Նախարարութիւնը արաբական երկիրներ ամբաստանեց «ցանցին ետին կանգնելու»
յանցանքով:Այս մասին կը յայտնեն արաբական լրատուամիջոցները։Նախարարութեան հրապարակած հաղորդագրութիւնը յայտնեց, որ «ապահովական մարմինները յաջողեցան ցանցին վերաբերեալ ապահովական ճշգրիտ եւ ամբողջական տեղեկութիւններ հաւաքել եւ թակարդ լարելէ ետք յաջողեցան ցանցին բոլոր անդամները ձերբակալել»` աւելցնելով, որ ցանցին ղեկավարը քանի մը տարի առաջ զինուորագրուած էր «արաբական մեծագոյն գործակալ եւ յետադիմական նկատուող պետութեան մը գաղտնի սպասարկութեան կողմէ»:
«Նշեալ գործակալը Իսրայէլի մէջ գաղտնի սպասարկական ու զինուորական մարզումի ենթարկուած է եւ Իրանի մէջ գործադրելու համար իրեն վստահուած գաղտնի սպասարկական առաքելութեան ցանկ մը ստանձնած է», նշուած է հաղորդագրութեան մէջ:
| All the contents on this site are copyrighted ©. |