Францішак сустрэнецца з кіраўніком Англіканскай Царквы
Папа Францішак 14
чэрвеня сустрэнецца з новаабраным кіраўніком Англіканскай Царквы, архіепіскапам Джасцінам
Уэлбі. Гэту навіну пацвердзіў у інтэрв’ю інфармацыйнаму агенцтву “SIR” кс. прэлат
Марк Лангам, адказны за дыялог з англіканамі ў Папскай радзе спрыяння хрысціянскаму
адзінтву. Ён адзначыў, што візіт Архіепіскапа Кентэрберыйскага ў Ватыкан будзе хоць
“кароткім і нефармальным”, але вельмі важным, бо гэта будзе першая сустрэча папы Францішка
і архіепіскапа Уэлбі. Паводле прадстаўніка Папскай рады, сустрэча стане добрай нагодай
як для Пантыфіка, так і для прымаса Англіканскай Царквы, лепш і глыбей пазнаёміцца
паміж сабой. Святар дадаў, што архіепіскап Уэлбі мае жаданне абмеркаваць з Папам некаторыя
важныя сусветныя праблемы, у тым ліку пытанні справялівасці і беднасці ў свеце. “У
сэрцах абодвух ляжаць тыя ж тэмы, таму, думаю, сустрэча будзе вельмі плённай”, - адзначыў
супрацоўнік Папскай рады спрыяння хрысціянскаму адзінтву.
Ужо па традыцыі,
пачанаючы з 1960-х гадоў, новапрызначаны кіраўнік Англіканскай Царквы прыбывае ў Рым
для сустрэчы з Пантыфікам. Архіепіскап Уэлбі неаднойчы з павагай выказваўся адносна
сацыяльнага навучання Каталіцкага Касцёла. Нядаўна іерарх, разам з прымасам Каталіцкага
Касцёла Англіі і Уэльса, арцыбіскупам Вінсэнтам Нікалсам, выступіў супраць рашэння
ўрада Кемерана, які меў намер скараціць сацыяльныя выдаткі ў Вялікабрытаніі.
Падчас
візіту ў Ватыкан англіканскі іерарх наведае месца пахавання бл. Яна Паўла ІІ і сустрэнецца
з кардыналам Куртам Кохам, старшынёй Папскай рады спрыяння хрысціянскаму адзінству.