E Enjtja e Madhe për Kishën mbetet një ditë, tek e cila duhet të kthehemi vazhdimisht,
për të kuptuar misionin, që na besoi Jezusi. Në atë Çenakull përmblidhet i tërë kuptimi
i krishterimit. Përmblidhet jeta e Krishtit dhe e Kishës së Tij. Fatet e tyre shkrihen
aq, sa të shndërrohen në një fat të vetëm e kështu të mos mund të bëjnë asgjë Njëri
pa Tjetrën. Misteri i vdekjes dhe i ngjalljes, ashtu si misioni i Kishës, përshpejtohen
e kodifikohen në themelimin e Eukaristisë. Eukaristia vijon të mbetet shenjë e përhershme,
që s’ka të perënduar, e pranisë së vetë Krishtit ndërmjet dishepujve, deri në ditën
e kthimit të Tij. Prandaj kremtimi eukaristik me gjithçka përmban, nga themelimi i
meshtarisë, tek detyra e bashkësisë së krishterë për t’i shërbyer botës, duke kumtuar
qiell të ri e tokë të re, për Kishën ka qenë e mbetet qendra e kulmi i jetës. E pamundur
të përjashtohet nga misteri eukaristik. E po aq e pamundur edhe të mos e vihet në
qender të fesë. Në Kishë gjithçka niset e kthehet tek Eukaristia. Këtu kundrimi i
misterit bëhet burim i kthesës në jetën personale e shoqërore, ndërsa fiton vlerë
veprimtaria e ungjillëzimit. Shëlbimi, që kumton Kisha, përshpejtohet e bëhet i dukshëm
pikërisht në misterin, që kremton. Themelimi i festës së Corpus Domini, Korpit
e Gjakut të Krishtit, në vitin 1246, shënoi një etapë të rëndësishme në udhën e përshkuar
nga Kisha në shekujt e mëparshëm, lidhur me kultin eukaristik. Eukaristia, e ruajtur
në zanafillë vetëm si shujtë për shtegtimin e mbramë, fitonte gjithnjë më shumë vlerë
për adhurimin nga ana e besimtarëve. Krishti i gjallë, me të vërtet i pranishëm në
mes të të vetëve, bëhej shok udhe për bashkësinë e krishterë, duke e ndihmuar t’i
mbartë me durim shqetësimet në jetën e përditshme. E duke e mbushur me shpresa të
reja. Sa më e madhe të jetë forca tërheqëse e Eukaristisë, aq më i madh është edhe
impenjimi i besimtarit për ta dëshmuar në mënyrë gjithnjë më bindëse fenë, në të cilën
beson. Prandaj, në organizimin e Vitit të Fesë, u shpreh dëshira për realizimin e
një shenje që, për herë të parë në historinë tonë, e bën edhe të dukshëm unitetin
e Kishës në një çast të vetëm kohor, rreth Eukaristisë. Sonte, nga ora 17.00 deri
në orën 18.00 me orën e Romës, në katedralet e botës e në mijëra e mijëra kisha,
përhapur deri në skajet më të largëta e më të harruara të Planetit, miliona sy do
të përqendrohen njëkohësisht mbi Misterin e Krishtit të pranishëm në Eukaristi. Për
një orë të tërë, mbarë Kisha në botë do të ndalet. Të gjitha veprimtaritë e saj të
panumërta, do të pushojnë për një çast, si të mos ishin. Mendimet e veprat e Kishës,
lutjet, këngët, ndjetet, ndjenjat, do të jenë vetëm për Zotin Jezus. Do të jetë një
ndalesë e shkurtër, për të marrë frymë, e për ta vijuar, pastaj, ecjen e mundimshme
në udhët e historisë, si Elia profet në shtegtim drejt Horebit.
Në një kohë
trishtimi e kapitjeje, në një çast kur fjala shpresë është pak e pranishme, ora e
adhurimit të Eukaristisë do të jetë përsëri burim force e ndihme. Kundrimi i misterit
nuk e largon njeriun nga impenjimi konkret, i përditshëm, për t’ia kthyer shpresat
botës, përkundrazi. Në kundrim njeriu gjen forcë për të ecur pa u lëkundur, si dishepujt
e Krishtit. Asgjë nuk është pasive, në këtë orë. Gjithçka shndërrohet në jetë që pulson
e përtërin. Veprat e fesë rifitojnë gjithë vlerën, e edhe gjithë kuptimin, që i vë
në lëvizje të krishterët, për t’i dhënë jetës së fituar këtu, domethënien e saj të
plotë. Në këtë orë adhurimi Kisha do t’ia ngulë sytë themelores. Për një orë
nuk do të mundë e as nuk do të dëshirojë të shikojë gjetiu, duke e ditur mirëfilli
se në Krishtin përmblidhet gjithçka. Fjalët e lashta të Pange lingua do të
tingëllojnë tejet aktuale! Për t’i dhënë siguri zemrës së sinqertë mjafton feja; të
ulemi, prandaj, në gjunjë për një orë e ta adhurojnë një mister kaq të madh. Forca
e fesë e mbarë Kishës, edhe një herë, i vjen në ndihmë ligështisë sonë!