Սուրիոյ Շուրջ 5 Յունիսի Խորհրդակցական Հանդիպումը

Ռուսիոյ արտաքին գործոց նախարարութենէն աղբիւր մը ռուսական «ՌԻԱ Նովոսթի» լրատու գործակալութեան յայտնեց, որ Ռուսիոյ արտաքին գործոց փոխնախարար Կենատի Կաթիլով 5 յունիսին Ժընեւի մէջ նախատեսուած Սուրիոյ շուրջ խորհրդակցական հանդիպումին ընթացքին պիտի ներկայացնէ Ռուսիան:
Միացեալ Նահանգներու արտաքին գործոց նախարարութեան բանբեր Ճէյն Փսաքի յայտնեց, որ Միացեալ Նահանգներու արտաքին գործոց փոխնախարար Ուենտի Շըրմըն եւ արտաքին գործոց նախարարի միջինարեւելեան հարցերով օգնական Էլիզապեթ Ճոնզ այդ հանդիպումին ընթացքին պիտի ներկայացնեն Միացեալ Նահանգները:
Ժընեւի մէջ ՄԱԿ-ի մամլոյ գրասենեակը իր կարգին յայտարարեց, որ ՄԱԿ-ի ընդհանուր քարտուղարի քաղաքական հարցերով օգնական Ճեֆրի Ֆելթման եւ Սուրիոյ հարցով ՄԱԿ-ի ու Արաբական լիկայի յատուկ պատուիրակ Լախտար Իպրահիմի պիտի մասնակցին «Ժընեւ-2» խորհրդաժողովի պատրաստութեան Ռուսիա-Միացեալ Նահանգներ-ՄԱԿ եռակողմանի հանդիպումին: