Կարտինալ Սանտրիի Խօսքը Յորդանանի ''Մատապա'' Համալսարանի Բացման Հանդիսութեա
Արեւելեան Եկեղեցիներու Ժողովի կառավարիչը` Կարտինալ Լէոնարտօ Սանտրին, շարունակելով
անցեալ 24 մայիսին սկիզբ առած, նախ Լիբանան ու ապա Յորդանան կատարած իր հովուական այեցլութիւնը,
հինգշաբթի մայիս 30-ին Յորդանանի Արքայ` Ապտալլահ Բ-ին հետ մասնակցեցաւ Երուսաղէմի Լատինաց
Պատրիարքութեան պատկանող ''Մատապայի'' Համալսարանի բացման հանդիսութեան, որուն ընթացքին
ճառ մը ուղղեց ներկաներուն յայտնելով գոհունակութիւնը այս ուրախ առիթով գտնուելու` ''ազնուական
այս երկրին մէջ'' որուն անունը ներշնջուած է ''Յորդանան գետէն'' ուր Յիսուս մկրտուեցաւ
եւ որ Քրիստոսի հաւատացողներուն համար մեծ նշանակութիւն ունի - ըսաւ Կարտինալը - նախ
քան Ապտալլահ Թագաւորին ներկայացնելու ֆրանչիսկոս Պապի յատուկ ողջոյնը։ Կարտինալ
Սանտրին ապա անդրադառնալով համալասարանի դերին մասին հաստատեց թէ անոր կէտնպատակն է ''երիտասարդներու
կրթութիւնը'' ապահովցնել ընդգծելով որ բոլոր հակամարտութիւններն ու աղքատութիւնը կարելի
է աստիճանաբար յաղթահարել այն ժամանակ երբ երիտասարդներու դաստիարակութեան ուղիով ներդրումներ
կատարուին։ Սոյն լոյսին տակ համալսարանը կրնայ դառնալ նաեւ միջկրօնական երկխօսութեան
ազդու դերակատար մը - ըսաւ Սանտրի Կարտինալը - մատնանշելով Պենետիկտոս ԺԶ-ի ''Եկեղեցին
Արեւելքի մէջ'' շրջաբերական թուղթին։ Ան ապա խօսքը ուղղելով համալսարանի ուսուցչական
կազմին եւ աշակերտութեան զանոնք քաջալերեց ըլլալու ճշմարտութեան արի վկաները։ Ճշմարտութիւնը
որ կը միացնէ եւ չի բաժներ- հաստատեց Ան - ու յորդորեց ներկաները ''աճելու իրարու փոխադարձ
յարգանքով''։ Արեւելեան Եկեղեցիներու Ժողովի կառավարիչը խօսքը եզրափակեց ըսելով թէ
''Եկեղեցին ուր ալ որ գտնուի կը փափաքի սատարել ամէն երկրի ազգային բարիքին` առանց սպառնալու
տեղական մշակոյթին եւ անհատական ժառանգութեան։'' Յայտնենք թէ Կարտինալ Սանտրին այսօր
31 մայիսին կ՛այցելէ Յորդանանի ''Րէճինա Բաչիս'' կեդրոնը ուր վերջին շրջանին դարձած է
սուրիացի գաղթականներու հիւրընկալութեան վայր։ Ան ապա Յուսին մէկին կը վերադառնայ Իտալիայ։