Kisha katolike përfundon muajin maj kushtuar nderimit të Zojës së Bekuar. Për këtë
rast organizohen kremtime Eukaristike, lutje e procesione tradicionale që u mundësojnë
besimtarëve të përshpirtshëm një pjesëmarrje të veçantë shpirtërore. Në përfundim
të kremtimeve fetare meshtarët u drejtojnë fjalën besimtarëve dhe mbyllin me bekimin
Hyjnor. Por, si lindi devocioni i muajit të Zojës? Përgjigjen na e jep rregulltari
monfortan, Atë Stefano Fiores:
Përgjigje: -Devocioni
i muajit të Zojës, muajit të majit, filloi në vitet 1700, përmes veprimtarisë së tre
jezuitëve, që kryenin misionin e tyre në veri, në qendër e në jug të Italisë. Më
i njohuri është atë Alfons Muxareli. Etërit jezuitë zgjodhën pikërisht muajin më të
bukur të vitit, kur natyra është në kulmin e lulëzimit, që t’i ftonin të gjithë besimtarët
për ta nderuar Nënën e Zotit, lulen më të bukur të njerëzimit.
Pyetje: -Çka përfaqëson Maria për gratë e kohëve tona?
Përgjigje: -
Gruaja e ditëve tona frymëzohet nga Maria, por sipas figurës biblike, e jo sipas disa
klisheve tradicionale, që e paraqesin si grua pasive, që pëson pa bëzajtë. Pali VI
në ‘Marialis Cultus”, e kundërshton këtë mënyrë paraqitjeje, duke i ftuar besimtarët
të shfletojnë Ungjillin për ta njohur Marinë, grua aktive, që e kupton mirëfilli përgjegjësinë
e vet, që merr vendime e ‘Madhëron Zotin’, sipas kritereve të dijes hyjnore e jo
të dijes njerëzore.
Pyetje: -Rruzarja Shenjte nuk është
praktikë që i përket së kaluarës, e aq më pak lutje mekanike – na kujton shpesh Papa;
ç’vlerë ka sot kjo lutje mariane?
Përgjigje: -Rruzarja
duhet konsideruar si mënyrë për të vënë në jetë atë që kremtojmë në liturgji e që
e shpallim në Shkrimin Shenjt. Është e qartë se Rruzarja nuk është sakrament,
e as kremtim liturgjik i mbarë Kishës. Megjithatë Rruzarja lidhet ngushtë me liturgjinë:
ashtu ai ajo, ushqehet nga Shkrimi Shenjt – Bibla e zhvillohet rreth misterit të Krishtit. Madje
cikli i mistereve të Rruzares mund të krahasohet me zhvillimin e vitit liturgjik. Me
kohën liturgjike të Ardhjes e të Krishtlindjes përkojnë misteret e gazmendit,
të përqendruara tek Mishërimi. Me kohën e Mundimeve e të Javës së Madhe,
përkojnë misteret e mundimeve të Shëlbuesit në Kryq. Koha e Pashkëve dhe
e Rrëshajëve pasqyrojnë misteret e lumturisë së Krishtit të ngjallur, që rrezatojnë
mbi Kishën. Festat e të Ngjiturit të Zojës në qiell dhe e Marisë Mbretëreshë e
qiellit dhe e tokës, përkojnë me dy misteret e fundit. Ndonëse në plane të ndryshme,
kremtimi liturgjik e kundrimi përmes Rruzares, na çojnë tek të njëjtat ngjarje të
shëlbimit, kryer nga Krishti. Ashtu si liturgjia, Rruzarja ka në qendër misterin e
Krishtit Shëlbues. Me qartësinë e tri serive të mistereve, Rruzarja nënvizon aspekte
themelore, ashtu si në skemën e predikimit të Apostujve: Biri i Hyjit u bë njeri,
u kryqëzua për mëkatet tona, u ngjall për lumturinë tonë.
Kujtojmë se
dita e fundit e muajit të Zojës kremtohet në qindra Kisha e kapela, kushtuar Nënës
së Krishtit në të katër anët e botës, e po kështu edhe në Shqipëri, në Kosovë e në
vise tjera shqiptare, posaçërisht në shenjtëroret kombëtare të Zojës së Këshillit
të Mirë rrëzë Kështjellës Rozafa në Shkodër, në shenjtëroren e mirënjohur të Zojës
në Letnicë të Vitisë, në Zymë të Prizrenit e vende tjera.