Dëgjues e lexues të nderuar të Radio Vatikanit ja disa fjalë mbi historinë
e solemnitetit të Korpit të Krishtit. Festa e Korpit të Krishtit mbyll ciklin e festave
të kohës së pas Pashkëve e kremton misterin e Eukaristisë. Duhet thënë se solemniteti
i Korpit dhe Gjakut të Shenjtnueshëm të Krishtit, latinisht "Corpus Domini", filloi
të kremtohej që më 1246 kur, duke pranuar dëshirën e një murgeshe të vitit 1246 dhe
devocionet Eukaristike të lindura në shekujt XII e XIII, për t'iu kundërvënë doktrinave
heretike rreth pranisë reale të Krishtit në lëndët e shuguruara gjatë Meshës, pra
në bukë e në verë, kjo festë u shtri në Kishën mbarë nga Papa Urbani IV përmes bulës
Transiturus të 11 gushtit të vitit 1264. Qe pikërisht ky papë i cili e kremtoi
personalisht festën e parë të Korpit të Krishtit në qytetin e Italisë Orvieto, më
19 qershor të njëjtin vit 1264, me solemnitet të madh. Në këtë kohë ndodhi edhe mrekullia
e Bolsenës në Lazio (Itali), më 1263 kur një meshtar bohem, Pjetri nga Praga, i cili
kishte dyshime mbi praninë reale të e Krishtit në Eukaristi, ndërsa kremtonte Meshën,
pa sesi nga hostja e shuguruar nisi të pikonte gjak. I njoftuar për faktin e mrekullueshëm,
Urbani IV ngarkoi ipeshkvin e Orvietos t'ia sillte linin shenjt të përgjakur dhe shkoi
personalisht ta merrte këtë dëshmi kaq tronditëse të pranisë së Krishtit. Në Romë
kremtimi filloi që nga njëmijë e katërqinda, në kohën e papës Nikolla V, me Meshën
në Bazilikën e Shën Gjonit në Lateran dhe procesionin drejt Bazilikës së Shën Marisë
së Madhe, që përshkohet nëpër rrugën Merulana qysh nga viti i largët 1575. Që prej
tre shekujsh, papët e ndryshëm që janë ulur në fronin e Shën Pjetrit, kanë vijuar,
me pak ndërprerje, të ndjekin të njëjtën rrugë, duke mbledhur miliona besimtarë rreth
Eukaristisë, burim i bashkimit e ushqim kryesor për jetën e të pagëzuarve. Secili
besimtar ftohet në këtë solemnitet të ulet rreth sofrës Eukaristike, ku ka vend për
të gjithë, e të shijojë më mirë Praninë e Krishtit, që kremtohet çdo ditë e çdo vit.