Shtegtimi i katolikëve shqiptarë në bazilikën e Shën Palit në Romë
Vijon në Romë shtegtimi i mase 350 besimtarëve katolikë shqiptarë nga të gjitha trevat
në kuadrin e Vitit të Fesë. Të udhëhequr nga shumë ipeshkvij shtegtarët katolikë shqiptarë
sot në ora 10.30 morën pjesë në Meshën Shenjte kremtuar në Bazilikën e Shën Palit
Apostull në Romë. Kremtimin Eukaristik e kryesoi ipeshkvi i Kosovës, imzot Dodë Gjergji,
me të cilin bashkëkremtuan Presidenti i Konferencës Ipeshkëvnore të Shqipërisë e kryeipeshkvi
i Shkodër-Pultit, imzot Angelo Massafra, kryeipeshkvi i Tivarit imzot Zef Gashi, ipeshkvi
i Rrëshenit, imzot Cristoforo Palmieri e shumë meshtarë e rregulltarë tjerë, imzot
Lucjan Avgustini, ipeshkëv i Sapës e imzot Ottavio Vitale, ipeshkëv i Lezhës. Në
homelinë e Meshës, imzot Dodë Gjergji foli mbi figurën e shembullin e Shën Palit Apostull,
që na mëson si ta pranojmë e të ndjekim Krishtin në udhën e jetës së përditshme duke
qëndruar besnik në çdo vështirësi. Imzot Gjergji pastaj foli mbi misionin e shën
Palit Apostull, mbi dashurinë që zbuloi në Jezu Krishtit Shëlbues, mbi forcën që pati
përherë gjatë veprimtarisë së përhapjes së Lajmit të Mirë ndër popujt, mes të cilëve
edhe në mesin e popullit shqiptar. Pas shtegtimit, të dielën, të besimtarëve katolikë
shqiptarë në Shenjtëroren e Zojës së Këshillit të Mirë në Genazzano afër Romës, dje
më 28 maj në Bazilikën e Shën Pjetrit në Vatikan, nesër para dite itinerari i shtegtimit
vijon në Sheshin e Shën Pjetrit në Vatikanit, me pjesëmarrjen në Audiencën e Përgjithshme
të Papës Françeskut. Pas takimit me Papën Bergoglio shtegtarët katolikë shqiptarë
do të kthehet në Bari të Italisë, ku rreth orës 19,30 do të jetë Mesha në Kishën Katedrale
të Shën Kollit, të cilën do të kryesojë ipeshkvi i Sapës, imzot Lucjan Avgustini,
e në mbrëmje kthimi për në vendlindje. Kujtojmë se ky shtegtim i besimtarëve shqiptarë
është organizuar nga Konferenca Katolike e Shqipërisë në bashkëpunim me kryedioqezën
e Tivarit dhe Administraturën Apostolike të Kosovës, me rastin e Vitit të Fesë e atë
të 1700-vjetorit të Ediktit të Milanos. Të dëgjojmë tre ipeshkvij shqiptarë imzot
Zef Gashin, imzot Dodë Gjergjin e imzot Lucjan Avgustinin, në mikrofonin e don David
Gjugjës...