Imzot Tomazi në OKB: çdo vit vriten mëse 100 mijë të krishterë, mjaft me persekutime
Selia e Shenjtë shpreh “shqetësimin e saj të thellë” për dhunimin e lirisë fetare
e për sulmet sistematike kundër bashkësisë së krishterë në disa zona të botës si Afrika,
Azia dhe Lindja e Mesme. Dje, Vëzhguesi i Vatikanit në selinë e OKB-së të Gjenevës,
imzot Silvano Maria Tomazi e ngriti zërin për të denoncuar se, sipas hetimeve të besueshme,
mëse 100 mijë të krishterë vriten çdo vit për arsye fetare. Të tjerë shpërngulen me
forcë, pësojnë përdhunime, u rrëmbehen liderët fetarë dhe u shkatërrohen vendet e
kultit. Shumë prej këtyre akteve, vazhdoi imzot Tomazi, janë fryt i fanatizmit, i
intolerancës, i terrorizmit dhe i ligjeve diskriminuese. Më pas, Vëzhguesi i
Selisë së Shenjtë hodhi një vështrim mbi vendet perëndimore, ku krishterimi përbën
bazat e kulturës e të shoqërisë. Edhe në këto vende, denoncoi ai, po forcohet gjithnjë
e më shumë prirja për ta mënjanuar krishterimin nga jeta publike, duke injoruar kontributin
e tij shoqëror e historik e madje, edhe duke i penguar bashkësitë në shërbimet e tyre
bamirëse. Imzot Tomazi kujtoi se Këshilli i OKB-së për të drejtat e njeriut ka pranuar
prej kohësh se feja dhe përshpirtëria janë në shërbim të dinjitetit njerëzor. Prelati
përmendi disa nga këto shërbime në fushën e arsimit e të shëndetësisë, të asistencës
për refugjatët pa dallim race e besimi fetar. E përfundoi fjalën e tij, duke kujtuar
Mesazhin e Papës Françesku për 1700 vjetorin e Ediktit të Milanos: “Të respektohet
kudo e drejta e shprehjes publike të fesë e të pranohet pa paragjykime kontributi,
që krishterimi vazhdon t’i japë kulturës dhe shoqërisë së epokës sonë”.