Не выключана, што Папа правядзе сеанс сувязі з касманаўтамі
Папа Францішак у канцы
чэрвеня, магчыма, правядзе размову з касманаўтамі Міжнароднай касмічнай станцыі, якія
адправяцца на арбіту 29 мая ў 00:32 па маскоўскім часе на караблі “Саюз” з касмадрома
“Байканур”. Аб гэтым паінфармаваў старшыня Італьянскага касмічнага агенцтва Энрыка
Саджэзэ, адзначыўшы, што ў склад экіпажу ўваходзіць італьянскі астранаўт Лука Пармітана,
які будзе знаходзіцца на арбіце разам з расіянінам Фёдарам Юрчыхіным і амерыканкай
Карэн Найберг. Арбітальная камандзіроўка экіпажа “МКС-36/37” будзе доўжыцца больш
за чатыры месяцы.
Калі сеанс сувязі Пантыфіка з касманаўтамі сапраўды адбудзецца,
ён стане другім у гісторыі. 21 мая 2011 г. Бэнэдыкт XVI з залы Факоні Апостальскага
палаца ў Ватыкане ўжо размаўляў з экіпажам Міжнароднай касмічнай станцыі. Тады ў яго
склад уваходзілі два італьянцы Паола Нэспалі і Раберта Віторыа. Святы Айцец сачыў
за відэамалюнкам на вялікім тэлеэкране, а на борт касмічнай станцыі трансляваўся толькі
гук. Сеанс сувязі працягваўся 20 хвілін. Папа, пасля кароткага ўступлення на англійскай
мове, задаў пяць пытанняў касманаўтам, на якія адказалі амерыканцы Марк Кэлі, Рон
Гаран і Майкл Фінке, а таксама два італьянцы. Святы Айцец падчас той размовы падзякаваў
касманаўтам за магчымасць разам паразважаць над пытаннямі, якія закранаюць будучыню
чалавецтва.