Кардынал Сандры заклікаў да вызвалення сірыйскіх праваслаўных іерархаў
Ліванская моладзь
сапутнічала папе Францішку на працягу першых гадзін яго пантыфікату; яна падрыхтавала
разважанні да сёлетняга Крыжовага Шляху ў Калізеі, які стаў адным з першых набажэнстваў,
што узначаліў Пантыфік. Аб гэтым нагадаў кардынал Леанарда Сандры 26 мая, у трэці
дзень свайго візіту ў Ліван, падчас сустрэчы з маладымі валанцёрамі мясцовай “Caritas”.
Вашай працай вы “дакранаецеся да Хрыстовага Цела”, сказаў прэфект Кангрэгацыі па справах
Усходніх Касцёлаў, цытуючы вядомае выказванне папы Францішка. Ватыканскі іерарх узгадаў
мінулагодні візіт Бэнэдыкта XVI у Ліван і назваў яго “промнем святла”, які адлюстраваўся
на небе Блізкага Усходу, пазначанага “чорнымі аблокамі вайны і насілля”. Паводле кардынала,
у Лівана ёсць надзея, бо менавіта мясцовыя маладыя людзі з’яўляюцца носьбітамі гэтага
святла і жадаюць праз веру і радасць будаваць “будучыню міра і паяднання”.
Падчас
Эўхарыстыі ў санктуарыі Маці Божай Спакою ў горадзе Захле, прэфект Кангрэгацыі па
справах Усходніх Касцёлаў заўважыў, што ў гэтым месцы адбываецца “перапляценне абрадаў
– мелькіцкага і мараніцкага – і адчуваецца сувязь з грэчаскім праваслаўем, што з’яўляецца
“стымулам для адзінства хрысціян, але і для ўсіх ліванцаў, таму што свабода і павага
павінны гарантавацца ўсім, а разнастайнасць з’яўляецца знакам багацця супольнасці”.
Кардынал Сандры скіраваў спецыяльную малітву да Найсвяцейшай Панны Марыі за двух праваслаўных
Патрыярхаў, выкрадзеных некалькі тыдняў таму ў Сірыі. “Няхай Марыя суцешыць іх і зробіць
іх моцнымі ў абліччы выпрабавання, у той час як мы кіруем моцны заклік аб іх вызваленні
і вяртанні ў іх сем’і і царкоўныя супольнасці”.