Afrika Qendrore: dhunë kundër të krishterëve. Vendi, në duart e rebelëve të Selekës
Të krishterët e Republikës Qendroafrikane janë në shënjestër të militantëve islamikë:
lidhen, rrihen e detyrohen t’u dorëzojnë atyre shuma të mëdha parash për të shpëtuar
jetën e vet. Denoncimi bëhet nga një pastor protestant për agjencinë katolike Fides
e flet për krijimin e një “mbretërie terrori” kundër të krishterëve nga ana e rebelëve
të Selekës, që kontrollojnë vendin nga marsi i kaluar. Ata sulmojnë kryesisht meshtarë,
por edhe të krishterë që punojnë, ndërsa vendet e kultit dhe pronat private të të
krishterëve plaçkiten. Të shumtë janë ata që largohen nga shtëpitë për të mos u kthyer
më. Mëse 200 mijë vetë janë shpërngulur nga vendi, ndërsa 49 mijë të tjerë kanë shkuar
si refugjatë në vendet fqinjë. Më 10 maj, organizata për të drejtat e njeriut
“Human Rights Watch” publikoi një raport, ku denoncohen “dhunime të rënda” kundër
civilëve nga ana e rebelëve të Selekës. Në to përfshihen plaçkitja, ekzekutime pa
gjyq, përdhunime e tortura. Kriza e Republikës Qendroafrikane, thonë krerët e krishterë,
injorohet krejtësisht nga mass media e popullsia e ndjen veten të braktisur nga bashkësia
ndërkombëtare”. Javën e kaluar, e dërguara e Kombeve të Bashkuara, Margaret Vogt,
e ftoi Këshillin e Sigurimit të OKB-së të reflektojë për mundësinë e disllokimit të
një force ndërkombëtare për të vënë rregull në gjendjen anarkike aktuale. Gjithashtu,
ajo kërkoi vendosjen e sanksioneve kundër rebelëve, akuzuar për dhunime të rënda të
të drejtave të njeriut.