Папа Францішак: за эксплуатацыяй і сучасным рабствам стаіць мафія
26 мая пасля малітвы
“Анёл Панскі” папа Францішак нагадаў аб постаці кс. Джузэпэ Пулізі, забітага ў 1993
г. мафіяй, які ўчора ў Палерма быў абвешчаны благаслаўлёным. “Кс. Пулізі быў узорным
святаром, які прысвяціў сябе асаблівым чынам душпастырству моладзі”. - сказаў Папа.
Ён адзначыў, што менавіта навучанне дзяцей паводле Евангелля і імкненне выцягнуць
іх з апраметнай, стала матывам забіцця святара мафіяй. “На самой жа справе ён выйграў
разам з уваскрослым Хрыстом”, - падкрэсліў Пантыфік. Святы Айцец прызнаўся, што яго
непакоіць лёс многіх людзей, і перш за ўсё дзяцей, якія эксплуатуюцца мафіяй, і вымушаны
рабіць тое, што чыніць іх рабамі, на чале з прастытуцыяй і сацыяльным уціскам. “За
гэтай эксплуатацыяй, рабствам, стаіць мафія”, - падкрэсліў Папа. Ён заклікаў сабраных
на плошчы св. Пятра прасіць Бога перамяніць сэрцы гэтых людзей. “Яны не павінны рабіць
гэтага! Яны не могуць рабіць нас, братоў, рабамі!”, - сказаў Пантыфік. Мы молімся,
каб гэтыя мафіозі навярнуліся да Бога і славім Бога за светлае сведчанне кс. Джузэпэ
Пулізі”, - дадаў ён.
Звыш 80 тыс. чалавек 25 мая ўзялі ўдзел у Палерма на Сіцыліі
ва ўрачыстай цырымоніі беатыфікацыі кс. Пулізі. “Яго гібель уяўляе сабой найважнейшая
сведчанне хрысціянскай веры, духоўнай шчодрасці і высокай грамадзянскай мужнасці”,
- гаворыцца ў пасланні, з якім да жыхароў Сіцыліі звярнуўся Прэзідэнт Італіі Джорджа
Напалітана. Тэлеграма кіраўніка дзяржавы была накіравана на імя арцыбіскупа Палерма
кардынала Паола Рамэа. “Варварскае забойства кс. Пулізі і яго сумленнае пастырскае
служэнне ў нялёгкіх умовах сацыяльнай рэальнасці Сіцыліі застануцца прыкладам для
ўсіх тых, хто не мае намеру падпарадкоўвацца дыктату арганізаванай злачыннасці”, -
напісаў Напалітана.