Papa në Engjëllin e Tënzot: mafiozët e mafiozet të kthehen në rrugën e Zotit; nuk
mund t’i përdorin si skllevër gratë e fëmijët!
“Mafiozët e mafiozet të kthehen në rrugën e Zotit!”. Për këtë u lut sot Papa Françesku
në Engjëllin e Tënzot, i miratuar nga duatrokitjet e stuhishme të besimtarëve, mbledhur
në Sheshin e Shën Pjetrit. Duke kujtuar Lumnimin e Don Puljisit, Papa dënoi me forcë
shfrytëzimin e miliona viktimave nga ana e mafieve të ndryshme.
Nuk ngrihej
nga Lugina e Tempujve të Agrixhentos, por nga dritarja mbi Sheshin e Shën Pjetrit,
zëri i Papës, që u kujtoi menjëherë besimtarëve një zë tjetër, lartuar 20 vjet më
parë me forcë, duke shqiptuar fjalë historike. Zërin e Papës Gjon Pali II, në vitin
1993. Historike edhe fjalët e Papës Françesku, që dënoi me forcë të gjitha mjediset,
ku krimi bëhet zot i jetës, duke përdorur të gjitha format e mundshme të shfrytëzimit
e të dhunës: “Mendoj për dhimbjen e thellë të burrave e të grave, por edhe
të fëmijëve, të shfrytëzuar nga mafiet e shumta, që i përdorin për qëllimet tyre,
duke i detyruar, me një mori presionesh shoqërore, të kthehen në skllevër, të merren
me prostitucion. Pas këtij shfrytëzimi, pas kësaj skllavërie, janë mafiet. Ta lusim
Zotin, që këta njerëz të pendohen, të kthehen në rrugën e Tij. Nuk mund të vijojnë
kështu! Nuk mund të na bëjnë ne, vëllezërit, skllevër! Duhet ta lusim Zotin! Të lutemi,
që këta mafiozë e këto mafioze të kthehen në rrugën e Zotit”. Ishte kujtimi
i don Pino Puljisit, lumnuar dje në atë Palermo, ku qe vrarë më 15 shtator, 20 vjet
më parë, nga dora e mafies, që e nxiti Papën të bëjë këtë denocim të fuqishëm. Jeta
dhe vdekja e këtij njeriu, pohoi me forcë Ati i Shenjtë, vijojnë të tingëllojnë si
qortim i ashpër për ata, që patën menduar ta zhduknin. Duke besuar se bashkë me të,
do të çrrënjosnin edhe bimën, mbirë nga fara e mirë e hedhur nga i Lumi: “Don
Puljisi ishte meshtar shembullor, që iu kushtua posaçërisht punës baritore me rininë.
Duke i edukuar të rinjtë sipas Ungjillit, i shkëpuste nga rruga e keqe, e pikërisht
kjo i shtyu zotërinjtë mafiozë ta vrisnin, duke menduar se kështu do ta zhduknin,
do ta mundnin. Por ai nuk u mund. Ai fitoi me Krishtin e Ngjallur”. Duartrokijet
e turmës, vigane dhe sot në mesditë, u bënë jehonë fjalëve të Papës që, në Solemnitetin
e sotëm të Trinisë Shenjte, i nxiti besimtarët për reflektime shpirtërore, duke u
folur për Trininë, ashtu siç kishte bërë pak më parë me fëmijët e një famullie romake.
E duke pohuar se ky mister ka kuptim konkret, jo të vagëlluar, Papa Françesku përdori
një shprehje, e cila tashmë është bërë e njohur nga të gjithë: “Zoti ynë
nuk është Zot spray, është konkret, nuk është abstrakt. Zoti është dashuri! Nuk është
dashuri sentimentale, emotive, por dashuri e Atit, që është në zanafillë të çdo jete;
dashuri e Birit, që vdes mbi kryq e ngjallet; dashuri e Shpirtit Shenjt, që rinon
njeriun e botën. Të mendojmë se Hyji është dashuri, na bën mirë, sepse na mëson të
duam, t’ua dhurojmë veten të tjerëve, si Jezusi , që na u dhurua ne e ecën me ne”. E
për ta fuqizuar konceptin e një dashurie, që nuk u lartua kurrë tepër lart, përmbi
fatet e njerëzimit, por përkundrazi, u lidh ngushtë me ngjarjet e historisë së çdo
epoke, Papa Françesku vijoi: “E Shenjtnueshmja Trini nuk është prodhim
i arsyetimeve njerëzore; është fytyra me të cilën vetë Zoti na u dëftua, jo nga maja
e një katedre, por duke ecur përkrah njerëzimit. Zoti eci me popullin e tij, në historinë
e popullit të Izraelit, e Jezusi eci gjithnjë me ne e na premtoi Shpirtin Shenjt.
E Shpirti i Zotit është zjarr, na mëson gjithçka, që nuk e dimë; na prin, na jep mendimet
e mira e frymëzimet e mira”. Mendimi i fundit, për Marinë, për Atë, pohoi
Papa Françesku, që për virtyt të Krishtit, sot është në lumninë e Trinisë e, në të
njëjtën kohë, mbetet Nënë, gjithnjë pranë bijve të saj, pranë nesh: “Është
Nëna e shpresës, Nënë që na ngushëllon, Nënë e ngushëllimit e Nënë, që na shoqëron
në gjithë udhën e jetës sonë. Ta lusim, prandaj, Zojën e Bekuar të gjithë së bashku,
ta lusim Nënën, që na shoqëron në udhën e jetës sonë”. Në përfundim të
lutjes së Engjëllit të Tënzot, pasi ia besoi ndërmjetësimit të të Lumit Puljisi e
të Shën Filip Nerit, edukatorit tjetër të madh të të rinjve, që Kisha e kremton më
26 maj – punën e Shoqatës Kombëtare Shën Pali të Oratoreve e Rretheve Rinore”, Papa
Françesku i kushtoi vëmendje të veçantë njërit nga grupet e shumta, në Sheshin e Shën
Pjetrit: “Përshëndes grupin e katolikëve kinezë, të pranishëm, të cilët
erdhën në Romë që të luten për Kishën në Kinë, duke kërkuar ndërmjetësimin e Zojës
Ndihmëtare”.