Հալէպի Մէջ Առեւանգուած Է Մտաւորական Յակոբ Միքայէլեան
21 մայիսին Հալէպ-Պէյրութ ճամբուն վրայ առեւանգած են Հալէպի հայ համայնքի անդամ, Հայկական
բարեգործական ընդհանուր միութեան կարկառուն դէմքերէն Յակոբ Միքայէլեանը: Գրոհայինները
կանգնեցուցած են հանրակառքը եւ ստիպած են միայն հայազգի Յակոբ Միքայէլեանին, որ դուրս
գայ, միւսները շարունակած են իրենց ճամբան: Յակոբ Միքայէլեան հայոց լեզուի ուսուցիչ է,
ան կը գրէ պատմուածքներ ու վէպեր: Եղած է վաստակաւոր դերասաններէն մէկը ՀԲԸՄ-ՀԵԸ-ի «Ադամեան»
թատերախումբին, դերեր վերցուցած է նաեւ սուրիական բազմաթիւ ֆիլմաշարերու մէջ:Ինչպէս կը գրէ Պոլսոյ «Ակօս» թերթը, Յակոբ Միքայէլեան ողջ է, անոր հետ կապ հաստատուած է հեռախօսով: Ինչպէս յայտնած են անոր հարազատները, Միքայէլեան կանգնած է զինուորական դատարանի առջեւ եւ դատապարտուած է 3 ամսուան ազատազրկման` Սուրիոյ նախագահ Պաշշար Ասատին հաւատարմութեան եւ Սուրիոյ նախագահին աջակցութեան ցոյցին մասնակցելու յանցանքով: Թերթը կը գրէ, որ 70-ամեայ Յակոբ Միքայէլեան առողջական խնդիրներ ունի:
| All the contents on this site are copyrighted ©. |