У мерапрыемствах,
якія праходзілі ў апошнія дні ў Рыме прыняла ўдзел група пілігрымаў з Беларусі. 14-21
мая прадстаўнікі Міжнароднай дыяконіі евангелізацыі Руху “Святло-жыццё” з Мінска наведалі
рымскія базылікі, ватыканскія дыкастэрыі і паўдзельнічалі ў набажэнствах з удзелам
Святога Айца: агульнай аўдыенцыі, сустрэчы з членамі рухаў і супольнасцяў, а таксама
Эўхарыстыі ва ўрачыстасць Спаслання Духа Святога. У склад групы уваходзіла восем вернікаў
з мінскай парафіі св. Сымона і св. Алены, на чале з іх духоўным кіраўніком кс. Ірынеўшам
Копачам. Паводле пілігрымаў, святкаванне ўрачыстасці Спаслання Святога Духа разам
з Папам дало магчымасць убачыць багацце і разнастайнасць Каталіцкага Касцёла. Аб гэтым
расказала Ватыканскаму радыё аніматар супольнасці Эмілія Сакаўчук.
“Мы мэтанакіравана
ехалі ў Рым на сустрэчу з Папам і заадно, каб перажываць тут “Аазіс новага жыцця”.
Мяне вельмі ўразіла, што, сапраўды, наш Касцёл вельмі багаты верай, жывы. Мы сустрэлі
шмат людзей, якія радаваліся ў Святым Духу, ад таго, што мы разам вітаем нашага Папу”,
- сказала яна.
Канешне, удзельнікаў пілігрымкі глыбока кранулі словы Пантыфіка,
які чарговы раз заклікаў не баяцца евангелізаваць і сведчыць пра любоў Бога праз клопат
пра самых бедных і безабаронных. Сваімі ўражаннямі падзялілася Валянціна Палілейка:
“Мяне найбольш уразілі словы Папы, які сказаў: не бойцеся, бярыце Езуса за руку і
ідзіце, прапаведуйце Хрыста, жывога, Хрыста, які любіць кожнага чалавека, асабліва
тых, хто ў бядзе. Не забывайцеся, што не павінна быць пакінутых і бедных, што наш
Касцёл – для бедных. Глядзіце ў вочы таму, хто просіць вас аб дапамозе”.
Для
Ганны Кавалеўскай магчымасць быць побач з магілай св. Пятра стала асабліва важнай,
каб адсюль малітоўна падтрымаць у цяжкасцях сваіх бліжніх. “Я ніколі не думала,
што ў маім жыцці такое можа быць. Маю цяжкасці дома, але Богу было патрэбна, каб я
была тут і малілася з адкрытым сэрцам за сваю сям’ю, за ўсіх беларусаў, каб Бог быў
у сэрцы кожнага чалавека”, - сказала яна.
Пілігрымка ў Рым, стала для мінскай
супольнасці “Каштоўная пярліна” першай і таму асабліва памятнай. Яе ўдзельнікі атрымалі
вялікую духоўную падтрымку для справы евангелізацыі ў Беларусі.