Papa: qeveritë dhe ligjvënësit t’i mbrojnë me forcë refugjatët.
Papa i fton qeveritarët dhe mbarë bashkësinë ndërkombëtare të mendojë për refugjatët,
të ndërmarrë nisma të frytshme, të kërkojë rrugë të reja për të mbrojtur dinjitetin
e tyre, për të përmirësuar cilësinë e jetës së tyre e për t’u bërë ballë sfidave,
që burojnë nga format moderne të persekutimit, të shtypjes e të skllavërisë. Flitet,
nënvizoi, për njerëz, që kanë nevojë për ndërhyrje urgjente, por edhe, e sidomos,
për mirëkuptim e mirësi. Tregtia e njerëzve është veprimtari e ulët, është turp i
madh për shoqëritë tona, që thonë se janë të qytetëruara. Shfrytëzues e klientë të
të gjitha niveleve, do të duhet të bënin një rrëmim të thellë para syve të tyre e
para syve të Zotit. Kisha, shtoi Papa, përsërit sot me forcë thirrjen për mbrojtjen
e dinjitetit të çdo njeriu, duke kujtuar se pikërisht njeriu duhet të jetë në qendër
të jetës, se duhet t’i respektohen të drejtat themelore, siç nënvizon Doktrina Shoqërore,
e cila kërkon t’u njihen të drejtat miliona burrave e grave të të pesë kontinenteve,
ku flitet shumë për dinjitet e pak bëhet për ta mbrojtur. Papa e bëri këtë thirrje
sot paradite, në audiencën me pjesëmarrësit në asamblenë plenare të Këshillit Papnor
për baritorinë e emigrantëve dhe endacakëve. Kujtojmë se mbledhja plenare e Këshillit
Papnor për emigrantët dhe endacakët, me temë: “Kujdesi baritor i Kishës, në rrethanat
e emigrimeve të detyruara” që nisi më 22 maj, përfundoi sot me audiencën tek Papa.
Diskutimet u orientuan nga dokumenti “Të mirëpresësh refugjatët dhe njerëzit e detyruar
të emigrojnë, do të thotë të mirëpresësh Krishtin”, hartuar nga dikasteri për emigrantët,
në bashkëpunim me Këshillin Papnor Cor Unum.