Kisha katolike e Kosovës kremton festën e Zojën Ndihmëtare.
Kisha katolike e Kosovës kremton festën e Pajtores së vet qiellor, Zojën e Bekuar
Ndihmëtare. Në Kishën Katedrale të Prizrenit kushtuar Zojës Ndihmëtare, besimtarët
katolikë të Kosovës janë mbledhur sot pranë Nënën së tyre qiellore për të kërkuar
ndërmjetësimin e saj amnor pranë Shpëtimtarit të njerëzimit, Jezu Krishtit për nevojat
e familjeve e të mbarë popullit kosovar. Meshën solemne të festës së Zojës Ndihmëtare
e kryesoi ipeshkvi i Kosovës, imzot Dodë Gjergji, në bashkëkremtim me shumë meshtarë
e rregulltarë të famullive të ndryshme kishtare e me një pjesëmarrje të jashtëzakonshme
të besimtarëve të ardhur nga të gjitha pjesët e Dardanisë së lashtë. Një gëzim i veçantë
në këtë kremtim për Kishën në Kosovë qe edhe shugurimi diakonit të ri dom Alfredit. Gjithnjë
sot, ipeshkvi i Kosovës imzot Dodë Gjergji merr pjesë në Konferencën Ndërfetare “Feja
dhe pajtimi, Cila është e ardhmja e dialogut ndërfetar?” në Pejë.Në këtë konferencë
merr pjesë edhe Kisha katolike e Shqipërisë që përfaqësohet nga delegati i Konferencës
Ipeshkëvnore Katolike të Shqipërisë, ipeshkvi i Sapës, imzot Lucjan Avgustini. Po
më tepër mbi këto dy ngjarje të dëgjojmë në mikrofonin e Radio Vatikanit ipeshkvin
e vendit imzot Dodë Gjergji...........
E siç përmendem,
në kuadër të aktiviteteve të “Javës së tolerancës dhe pajtimit në Kosovë”, nga data
20 deri më 26 maj, në Pejë mbahet Konferenca Ndërfetare “Feja dhe pajtimi, Cila është
e ardhmja e dialogut ndërfetar?”. Kjo konferencë, ku janë pranishëm përfaqësues komunitetesh
fetare e liderë të shoqërisë civile, i përkushtohet dialogut pozitiv e të hapur në
Vend. Panelet e konferencës i zhvillojnë punimet nën rregullat e “Chatam House”,
pra pa praninë e mediave. Pjesëmarrësve të konferencës e përfaqësuesve të mediave,
do t’iu drejtohen Presidentja e Kosovës, Atifete Jahjaga, ministri i Punëve të Jashtme
të Kosovës, Enver Hoxhaj e përfaqësues të komuniteteve fetare e të komuniteteve etnike
në Republikën e Kosovës. Konferenca është hapur për media.