Арцыбіскуп Кандрусевіч меў кароткую размову з Папам
Арцыбіскуп Тадэвуш
Кандрусевіч меў 22 мая кароткую размову з Папам Францішкам. Як распавёў Ватыканскаму
радыё сам Мітрапаліт Мінска-Магілёўскі, пасля агульнай аўдыенцыі на плошчы св. Пятра
ён коратка прадставіўся Пантыфіку, але той адказаў “Але ж мы знаёмыя з табой!”. Сапраўды,
іерархі сустракаліся неаднойчы на рознага тыпу мерапрыемствах, арганізаваных на ўзроўні
Святога Пасаду. Арцыбіскуп прызнаўся, што, не гледзячы на гэта, яго ўразіла памяць
Пантыфіка, які змог пазнаць і вылучыць яго з вялікага шэрагу іерархаў, якіх толькі
на аўдыенцыі было некалькі дзесяткаў.
Мітрапаліт падзякаваў Папе за прызначэнне
свайго спецыяльнага пасланніка ў асобе кардынала Жана Луі Тарана на ўрачыстасці Маці
Божай Будслаўскай, на што Святы Айцец адказаў: “Так, ведаю!”. Арцыбіскуп перадаў Францішку
сардэчныя прывітанні ад “беларускага Касцёла і беларускага народа” і сказаў, што вернікі
ў Беларусі чакаюць, “каб нага Пантыфіка ступіла на Беларускую зямлю, якая заслугоўвае
гэтага”. “Ён так паглядзеў на мяне, і кажа: “Маліся за мяне!”, - падзяліўся іерарх.
Мітрапаліт лічыць, што такі адказ можа азначаць жаданне Святога Айца, каб вернікі
маліліся аб яго візіце ў Беларусь.
Трэба адзначыць, што размова арцыбіскупа
Кандрусевіча з Папам трывала значна даўжэй за размовы Пантыфіка з іншымі іерархамі.