Lutja e Papës për katolikët në Kinë me rastin e kujtimit të Zojës së Sheshanit.
Të premten e ardhshme, më 24 maj, në kujtimin liturgjik të Zojës Ndihmëtare, do të
kremtohet Dita e lutjes për Kishën në Kinë, themeluar nga Benedikti XVI në vitin 2007. Kujtojmë
se Papa Benedikti pati shkruar edhe “Lutjen drejtuar Zojës së Sheshanit”, pikërisht
për Ditën e lutjes kushtuar Kishës në Kinë, që kremtohet çdo vit më 24 maj. Papa ia
larton uratën Virgjërës së Sheshanit, Zojës të shenjtërores së njohur mariane, që
ndodhet në Kinë, pranë Shangait. Lutja, sipas dëshirës së Benediktit XVI e tani
edhe të Papës Françesku, vijon të kremtohet në mbarë botën më 24 maj, ditën e festës
së Zojës Ndihmëtare. Papa Françesku e kujtoi, në përfundim të audiencës së sotme
të përgjithshme, me këto fjalë:“I ftoj të gjithë katolikët e botës të bashkohen
në lutje me vëllezërit e motrat, që janë në Kinë, për të nxjerrë
nga Zoti hirin ta kumtojnë me përvujtëri e gëzim Krishtin e vdekur e të
ngjallur, të jenë besnikë ndaj Kishës së
tij e pasardhësit të Shën Pjetrit e ta jetojnë
çdo ditë në shërbim të vendit të tyree
të bashkëqytetarëve, në përkim me fenë,
në të cilën besojnë. Duke bërë tonat disa nga fjalët e Lutjes drejtuar Zojës së Sheshanit,
dëshiroj, së bashku me ju, t’i drejtohem Virgjërës Mari me këto fjalë: ‘O Zoja jonë
e Sheshanit, ndihmoi të gjithë ata që, në Kinë, në mundimin e përditshëm, vijojnë
të besojnë, të shpresojnë e të duan, të mos të kenë kurrë më frikë t’i flasin botës
për Jezusin e Jezusit për botën’. O Mari, Virgjër besnike, ndihmoi katolikët kinezë,
bëji impenjimet tyre të vështira, përherë e më të çmuara para syve të Zotit e premto
të rritet gjithnjë më shumë dashuria e pjesëmarrja e Kishës në Kinë, në udhën e Kishës
universale”.