Në lutjen e Mbretëreshës Qiellore, Papa e quajti Sheshin e Shën Pjetrit “Çenakull
nën qiellin e hapur”.
Rrëshajë të reja, që e shndërruan Sheshin e Shën Pjetrit në Çenakull nën qiell të
hapur”: me këto fjalë, gjatë lutjes së Mbretëreshës Qiellore, Papa Françesku komentoi
atë, që e quajti “Festë e fesë”. E festa nisi që të shtunën, për të arritur kulmin
dje paradite, me Meshën Shenjte të solemnitetit. “Jetuam përvojën e Kishës në fasha”,
vijoi Papa Françesku, duke nënvizuar bukurinë, që buron nga uniteti: “Edhe ne,
në larminë e karizmave, provuam bukurinë e unitetit, ndjemë ç’do të thotë të jesh
një gjë vetme. E kjo është vepër e Shpirtit Shenjt, që krijon përsëri e përsëri unitet
në Kishë”. E Papa i falënderoi të gjitha lëvizjet, shoqatat, bashkësitë, grupet
kishtare: “Jeni dhuratë e pasuri për Kishën. Kështu jeni ju! Ju falënderoj,
në radhë të parë, ju të gjithë, që erdhët në Romë, e nga të katër anët e botës. Mbarteni
gjithnjë forcën e Ungjillit! Mos kini frikë. E mos e humbisni kurrë gëzimin dhe pasionin
për bashkimin në Kishë! Zoti i ngjallur qoftë përherë me ju e Zoja e Bekuar ju ndihmoftë”. Pastaj,
mendimi për popullsitë e Emilia Romanjës që, më 20 maj të vitit të kaluar, u dëmtuan
rëndë nga tërmeti. E një lutje edhe për Federatën Italiane të Shoqatave të Vullnetariatit
në Onkologji. Së fundi, përshëndetja drejtuar të gjithëve: “Vëllezër e motra,
ju falënderoj shumë e shumë për dashurinë tuaj ndaj Kishës! Të diel të gëzuar, për
shumë vjet festën e drekën e mirë”.