Папа: не быць хрысціянамі з добрымі манерамі і дрэннымі звычкамі
Не быць хрысціянамі
з добрымі манерамі і дрэннымі звычкамі, заклікаў папа Францішак падчас Эўхарыстыі
ў Доме св. Марты, якую цэлебраваў раніцай 18 мая. Сваю гамілію Пантыфік прысвяціў
распаўсюджанай, нават сярод вернікаў, спакусе пляткарыць, “улазіць у жыццё іншых”.
Паводле Францішка, плёткі з’яўляюцца разбуральнымі для хрысціянскай супольнасці і
ўтрымліваюць у сябе “дух Каіна” – жаданне “забіць брата мовай”. Святы Айцец адзначыў,
што плёткамі людзі прыніжаюць сваіх бліжніх, замест таго, каб дапамагаць ім расці.
“Раблю, каб іншы стаў ніжэй і адчуваю сябе вялікім”, - сказаў Папа. Ён параўнаў звычку
распаўсюджвання плётак са спажываннем цукерак: “бярэш адну, затым іншую, і яшчэ, і
яшчэ, а потым пачынае балець жывот”. Таксама і плёткі, “яны салодкія напачатку, а
потым знішчаюць, знішчаюць душу”. “Плёткі – дэструктыўныя для Касцёла”, - падкрэсліў
Францішак.
Папа таксама расказаў, што існуе тры спосабы распаўсюджвання плётак:
“Мы робім дызынфармацыю: кажам толькі пра палову, якая нам выгодная, а не пра іншую;
пра іншую не кажам, бо яна не зручная для нас. (...) Другое, гэта ачарненне: калі
чалавек па-сапраўднаму мае дэфект, мы яго раздуваем, апавядаем аб ім, працуем “як
журналісты”. Так гонар гэтага чалавека знішчаецца. І трэццяе, гэта паклёп: значыць,
казаць рэчы, якія не з’яўляюцца праўдай. Гэта менавіта азначае забіць брата! Усе тры:
дызынфармацыя, ачарненне і паклёп – гэта грахі. Яны азначаюць, даваць аплявуху Езусу
ў абліччы Яго сыноў, Яго братоў”, - сказаў Святы Айцец.
Францішак нагадаў словы
Езуса: “Што табе да гэтага? Ты ідзі за Мною”, якія Збаўца скіраваў да св. Пятра, калі
той цікавіўся асобай здрадніка і пытаўся, у сувязі з гэтым пра апостала Яна. “Не займайцеся
фантазіямі, думаючы, што збаўленне заключаецца ў параўнанні з іншымі ці пляткаванні”,
- сказаў Пантыфік і дадаў, што збаўленне ў тым, каб ісці за Хрыстом. “Папросім сёння
Пана Езуса, каб даў нам ласку не ўлазіць у жыццё іншых, не станавіцца хрысціянамі
з добрымі манерамі і дрэннымі звычкамі, а наследаваць Езуса, ісці за Ім па Яго шляху.
І гэтага дастаткова!”, - сказаў Францішак.