Սուրիոյ Գծով ՄԱԿ-ի Որդեգրած Բանաձեւին Թեր Եւ Դէմ Կարծիքներ
Ծոցի համագործակցութեան խորհուրդի ընդհանուր քարտուղար Ապտել Լաթիֆ Զայանի ողջունեց ՄԱԿ-ի
ընդհանուր ժողովին կողմէ որդեգրումը արաբական բանաձեւին, որ կը դատապարտէ Սուրիոյ մէջ
բռնարարքներու եւ սպանութեանց մագլցումը, ինչպէս նաեւ «սուրիական իշխանութեանց կողմէ
մարդկային իրաւանց ահաւոր խախտումներու շարունակումը»` նշելով, որ «յանուն խումբ մը երկիրներու
Քաթարի ներկայացուցած որոշումը սուրիացի եղբայրներուն ապրած ցաւալի աղէտին վերջ տալու
համար շրջանային ու միջազգային ջանքերուն ծիրին մէջ կարեւոր եւ անհրաժեշտ քայլ մը կը
ներկայացնէ»: Զայանի ըսաւ, որ «որոշումը սուրիացի արաբ ժողովուրդին դէմ գործուած ոճիրներուն
աշխարհի պետութեանց մեծամասնութեան մերժումն ու բուռն դատապարտումը կ՛արտայայտէ»: Ան
յոյս յայտնեց, որ միջազգային ընտանիքի կամքը համընկնի սուրիացի ժողովուրդը պաշտպանելու
եւ անոր արդար ձգտումները իրականացնելու անհրաժեշտութեան` հեռու մնալով այժմէական նեղ
շահերէն: Եւրոպական Միութիւնը եւս ողջունեց ՄԱԿ-ի ընդհանուր ժողովին որդեգրած բանաձեւը: Ռուսական
ԻԹԱՐ-ԹԱՍՍ լրատու գործակալութիւնը կը հաղորդէ, որ Հարաւային Ափրիկէի կառավարութեան բանբեր
Ֆումլա Ուիլիըմզ միջազգային ընտանիքին կոչ ուղղած է «Սուրիոյ գերիշխանութիւնը յարգելու,
որպէսզի սուրիացիները իրենք կարենան տագնապին լուծում մը գտնել»: Նշենք, որ ՄԱԿ-ի
Ընդհանուր ժողովը երէկ որդեգրեց բանաձեւ մը, ըստ որուն, Սուրիոյ ընդդիմադիր ուժերը կ՛ընդունուին
իբրեւ սուրիացի ժողովուրդի «օրինական ներկայացուցիչներ»: ՄԱԿ-ի անդամ 193 երկիրներէն
միայն 12-ը անոր դէմ քուէարկեցին: Թուրքիոյ նախագահ Ապտիւլլա Կիւլ քննադատեց «Սուրիոյ
տագնապին նկատմամբ միջազգային հակազդեցութիւնը»` յայտնելով, որ ատիկա «միայն խօսք է»: Ռուսական
«Ինթըրֆաքս» լրատու գործակալութիւնը հաղորդեց, որ ՄԱԿ-էն աղբիւր մը նախատեսած է, որ Սուրիոյ
տագնապի լուծման «Ժընեւ-2» միջազգային խորհրդաժողովը գումարուի 10-էն 12 յունիսի միջեւ:
Միացեալ Նահանգներու արտաքին գործոց նախարարութենէն պաշտօնատար մը իր կարգին «Շարք Աուսաթ»-ին
յայտնեց, որ Միացեալ Նահանգներ ներկայիս միջազգային գործընկերներու հետ կը քննարկէ «Ժընեւ-2»-ի
մասնակիցներու հարցը: Ան մերժեց մեկնաբանել Իրանի մասնակցութեան վրայ Ռուսիոյ պնդումը: Մինչ
այդ, Սուրիոյ վարչապետ Ուաէլ Հալքի յայտնեց, որ սուրիական կառավարութիւնը պատրաստ է քաղաքական
բոլոր ուժերուն եւ սուրիական ընկերութեան բաղադրիչ բոլոր տարրերուն հետ երկխօսութիւն
կատարելու: