Ազգային Երկխօսութեան Խորհրդաժողովը Տեղի Պիտի Ունենայ Սուրիական Հողի Վրայ Եւ Սուրիացիներուն
Կամքով» Ըսաւ Սուրիոյ Վարչապետը
Սուրիոյ վարչապետ Ուաէլ Հալքի Սուրիոյ բոլոր քաղաքացիներուն կոչ ուղղեց մասնակցելու ազգային
երկխօսութեան երթին` հասնելու համար ազգային երկխօսութեան խորհրդաժողովին: Սուրիոյ
վարչապետը յայտնեց, որ «ազգային երկխօսութեան խորհրդաժողովը տեղի պիտի ունենայ Սուրիոյ
հողին վրայ եւ միայն սուրիացիներուն կամքով` առանց արտաքին միջամտութեան` ճշդելու համար
Սուրիոյ քաղաքական նոր ապագան, որ կ՛ամրապնդէ ապահովութիւնն ու կայունութիւնը եւ վերաշինութեան
ընթացք կու տայ»: Ռուսիոյ արտաքին գործոց նախարար Սերկէյ Լաւրով յայտնեց, որ «Սուրիոյ
շուրջ միջազգային խորհրդաժողովի յաջողութիւնը կարիքը ունի այս նախաձեռնութեան նկատմամբ
սուրիական ընդդիմութեան աջակցութեան»` աւելցնելով, որ բոլորը պէտք է զօրակցին ռուս-ամերիկեան
համաձայնութեան: Եգիպտոսի արտաքին գործոց նախարար Նեպիլ Ամրօ յայտարարեց, որ «Եգիպտոս
կ՛ողջունէ Սուրիոյ տագնապի լուծման ռուս-ամերիկեան համաձայնութիւնը»: Իսրայէլեան ձայնասփիւռի
կայանը հաղորդեց, որ Սուրիոյ բանակին եւ ընդդիմադիր զինեալներու միջեւ բախումներուն ընթացքին
արձակուած երկու հրասանդի հրթիռներ ինկած են բռնագրաւեալ Կոլանի հիւսիսը գտնուող Ժապալ
Շէյխ շրջանին մէջ: Իսրայէլեան «Ետիոթ Ահրոնոթ» օրաթերթի կայքէջը երէկ հաղորդեց, որ
սուրիական ընդդիմութենէն զինեալներ երէկ ազատ արձակած են Կոլանի մէջ տեղակայուած ՄԱԿ-ի
ապահովական ուժերու այն երեք անդամները, որոնք երեքշաբթի գիշեր առեւանգուած էին: Յորդանանի
տեղեկատուութեան նախարարը երէկ հաղորդեց, որ սուրիական ընդդիմութիւնը պիտի չմասնակցի
Յորդանանի մէջ տեղի ունենալիք Սուրիոյ բարեկամներու ժողովին: Մինչ այդ, Իրանի արտաքին
գործոց նախարար Ալի Աքպար Սալեհի յայտարարեց, որ 29 մայիսին Թեհրանի մէջ տեղի պիտի ունենայ
սուրիացի ժողովուրդի բարեկամներու ժողովը: