Святы Айцец: Касцёл мае патрэбу ў апостальскім запале

Касцёл мае патрэбу у апостальскім запале, які падштурхне нас ісці наперад у абвяшчэнні Езуса, лічыць папа Францішак. Ён узначаліў Эўхарыстыю ў Доме св. Марты раніцай 16 мая, у якой прынялі ўдзел супрацоўнікі Ватыканскага радыё. У гаміліі Пантыфік звярнуў увагу на асобу апостала Паўла, жыццё якога было напоўнена барацьбой і шматлікімі выпрабаваннямі. “Яго лёс, гэта лёс шматлікіх крыжоў, але ён ішоў наперад, глядзеў на Пана і ішоў наперад”, - падкрэсліў Святы Айцец. “Пан заўсёды хоча каб мы ішлі наперад, каб не ўцякалі ў спакойнае жыццё”, - сказаў Папа і дадаў, што св. Павел меў апостальскі запал і не быў “чалавекам кампрамісаў”. Аднак, гэта, паводле Святога Айца, не тлумачыцца толькі яго тэмпераментам. Менавіта Пан падштурхнуў яго “ісці наперад” і даваць сведчанне. Францішак адзначыў, што св. Павел не шукаў камфортнага жыцця і таму сваім прапаведваннем, працай і паводзінамі ствараў часта нязручнасці для многіх, мабілізуючы іх таксама не шукаць камфорту.

“Апостальскі запал – гэта не энтузіязм дзеля дасягнення ўлады, дзеля набыцця чагосьці. Гэта нешта, што паходзіць знутры, тое, чаго Пан хоча ад нас: быць хрысціянамі з апостальскім запалам. Адкуль паходзіць гэты апостальскі запал? Ад ведання Езуса Хрыста. Павел знайшоў Езуса Хрыста, сустрэў Яго. Пазнаў Яго не дзякуючы інтэлектуальнаму, навуковаму пошуку, хоць і гэта важна, бо дапамагае нам – але дзякуючы пазнанню сэрцам, асабістай сустрэчы”, - сказаў Папа.

Францішак заклікаў удзельнікаў св. Імшы прасіць аб апостальскім запале і не быць “хрысціянамі цёплымі”, якія “не хочуць ісці наперад”, не быць “хатнімі хрысціянамі”, “добра выхаванымі”, але не ўмеючымі быць сынамі Касцёла, маючымі апостальскі запал.