«Պէտք Է Հրաժարիլ Սուրիոյ Մէջ Այնպիսի Արարքներէ, Որոնք Կրնան Կացութեան Քայքայման Առաջնորդել»
Ըսաւ Փութին
Ռուսիոյ նախագահ Վլատիմիր Փութին եւ Իսրայէլի վարչապետ Պենիամին Նեթանիահու երէկ Սոչիի
մէջ հանդիպում ունեցան, սակայն անոնք հրապարակաւ Սուրիոյ վարչակարգին տրամադրուող ռուսական
հրթիռներու հարցին չանդրադարձան: Իսրայէլացի պաշտօնատարներ Ռուսիոյ կոչ ուղղած էին Սուրիոյ
«Էս-300» հակաօդային համակարգերու մատակարարման ծրագիրը չգործադրելու:Հանդիպումին աւարտին Փութին յայտնեց, որ Ռուսիա եւ Իսրայէլ Սուրիոյ տագնապին նկատմամբ հասարակաց մտահոգութիւններ ունին, իսկ ինք եւ Նեթանիահու կը հաւատան, որ սուրիական տագնապը ամբողջ շրջանին համար ժխտական հետեւանքներ կը պարունակէ` շեշտելով, որ «պէտք է հրաժարիլ Սուրիոյ մէջ այնպիսի արարքներէ, որոնք կրնան կացութեան քայքայման առաջնորդել»: Ան աւելցուց, որ իրենք համաձայնած են անձնական հանդիպումներու եւ երկու երկիրներու գաղտնի սպասարկութեանց ճամբով հետեւելու Սուրիոյ կացութեան:
Ան յայտնեց, որ «Սուրիոյ մէջ ժխտական դիպաշարը կարելի է կանխարգիլել միայն անմիջապէս զինեալ տագնապը կասեցնելու եւ քաղաքական փոխզիջման անցնելու միջոցով»:
Նեթանիահու իր կարգին յայտնեց, որ Միջին Արեւելքի մէջ անկայուն վիճակը կացութիւնը բարելաւելու ուղղութեամբ քայլեր կը պահանջէ: Ան ընդգծեց, որ Իսրայէլ իր ժողովուրդը պաշտպանելու կարիքը ունի:
| All the contents on this site are copyrighted ©. |