Dita e Lëvizjeve Kishtare: të shtunën e të dielën, mëse 120 mijë vetë në Shën Pjetër
E diela e ardhshme nuk është vetëm Dita e Rrëshajëve, por edhe ajo e Lëvizjeve Kishtare.
Deri tani, mëse 120 mijë vetë janë regjistruar për të ardhur në Sheshin e Shën Pjetrit
të shtunën e të dielën, në takimin me Papa Françeskun. Sot, kjo nismë e Vitit të Fesë
u paraqit në Sallën e Shtypit të Vatikanit nga imzot Rino Fizikela, kryetar i Këshillit
Papnor për Promovimin e Ungjillëzimit të Ri. Lëvizjet kishtare u shtuan me nxitjen
e Koncilit II të Vatikanit e të gjitha, me karizmën e tyre, punojnë për përhapjen
e Ungjillit të Krishtit. Por të dëgjojmë imzot Fizikelën: “Ndryshojnë emrat,
metodologjitë dhe mjetet, që shprehin pasurinë e Shpirtit Shenjt dikuar në karizmat
e çdo nismëtari, por objektivi dhe qëllimet mbeten të njëjta e të përbashkëta për
të gjitha lëvizjet: të çohet gëzimi i Ungjillit tek çdo njeri”. Shifrat, që
karakterizojnë këto dy ditë janë të rëndësishme: mëse 120 mijë vetë nga 150 realitete
të ndryshme kishtare në të gjithë botën. Katoliciteti i Kishës nuk njeh kufij, theksoi
kreu i dikasterit për Ungjillëzimin e Ri, i cili shpjegoi edhe moton e këtyre dy ditëve
shkëmbimi përvojash: “’Unë besoj! Përforcoje fenë brenda nesh’. Përemrat vetorë
e tregojnë vetë kuptimin. Secili prej nesh, është i thirrur ta shpallë personalisht
përkatësinë e tij në Kishën e Krishtit. Është një vendim i lirë e personal, që sjell
përforcimin e fesë së marrë në pagëzim”. Me pjesëmarrjen e tyre në lëvizjet
kishtare, shumë vetë, tha imzot Fizikela, jo vetëm kanë gjetur fenë e humbur rrugës,
apo atë që, me kohë, është bërë indiferente dhe e pafrytshme, por edhe kanë ndryshuar
krejtësisht jetën. Feja, nënvizoi ai, është akt i bashkësisë. Njeriu përforcohet në
fe, vetëm në konfrontimin me të tjerët, brenda Kishës. Në orën 7 të mëngjesit
të së shtunës, së paku 50 mijë vetë, në grupe nga 50 besimtarë, do të shtegtojnë për
tek Varri i Shën Pjetrit. Në orën 15, një çast reflektimi në shesh, ku në orën 18,
pritet Papa Françesku. Para tij, do të tregojnë për përvojën e tyre jetësore, shkrimtari
dhe kompozitori irlandez Xhon Uoters si edhe Paul Bhati, vëllai i Ministrit të Pakicave
etnike e fetare të qeverisë pakistaneze, vrarë para dy vjetësh. Ndër të pranishmit,
edhe disa persona me të meta fizike, për të cilët parashikohet përkthimi në gjuhën
e shenjave për shurdhmemecët. Të dielën paradite, në orën 10.30, mesha e kremtuar
nga Ati i Shenjtë në Sheshin e Shën Pjetrit e lutja e Mbretëreshës Qiellore në festën
e madhe të Rrëshajëve. Duke iu përgjigjur pyetjeve të gazetarëve, imzot Fizikela
u ndal në të ashtuquajturin “efekt i Papës Françesku”, që ka sjellë në Romë me mijëra
njerëz, për ndjekjen e audiencave të përgjithshme e të lutjeve të së dielës me Atin
e Shenjtë: “Shprehja ‘efekti i Françeskut’ nuk më pëlqen edhe aq, por më duket
se është e vërtetë që prania e Papës Françesku prek zemrat e mendjet e shumë e shumë
njerëzve. Unë vetë kam folur me famullitarë e meshtarë, të cilët më konfirmojnë se
shumë njerëz i janë afruar Sakramentit të Rrëfimit: ‘Vij – thonë – sepse jam prekur
nga fjala e Papës dhe ndjej dëshirën për t’u rrëfyer’. Nëse ky është ‘efekti i Françeskut’,
unë besoj se njerëzit duan të jenë aty, me Papën, t’ia dëgjojnë zërin, ta shohin,
ta prekin, pasi ai është shumë i afërt. Jemi të kënaqur, sepse kjo sjell një reflektim
për rëndësinë e fesë, për rëndësinë e të qenit të krishterë e pra, edhe për vlerën
që Papa mund të ketë në këtë çast për jetën e Kishës”.