Արեւմտահայերէնը Թուրքիոյ Մէջ Անհետացող Լեզուներու Շարքին
Երեւան։ Արեւմտահայերէնը Թուրքիոյ մէջ անհետանալու վտանգին տակ գտնուող
18 լեզուներէն մէկն է՝ ըստ ԵՈՒՆԵՍՔՕի հրապարակած՝ «Աշխարհի վտանգուած լեզուներու քարտէս»ին,
կը հաղորդէ «Արմէնփրէս» լրատու գործակալութիւնը: Արեւմտահայերէնը, ինչպէս նաեւ հայերէնի
համշէնեան բարբառը, լազերէնը, ասորերէնը, յունարէնը, աբխազերէնը եւ պոնտոսեան յունարէնը
ներառնուած են յստակ վտանգի տակ գտնուող լեզուներու ցանկին վրայ: ԵՈՒՆԵՍՔՕի ցանկին
համաձայն՝ Թուրքիոյ մէջ արեւմտահայերէնը կը գործածուի Պոլսոյ եւ Վագըֆ գիւղին մէջ, մօտաւորապէս
50,000 հայերու կողմէ: Հայաստանի պարագային՝ նոյն ցանկին վրայ վտանգի ենթակայ կը նկատուին
միայն երկու լեզու՝ ասորերէնը եւ պոնտոսեան յունարէնը, մինչ Ատրպէյճանի եւ Վրաստանի մէջ
նման լեզուներու թիւը 11 է: ԵՈՒՆԵՍՔՕի հրապարակած ցանկին վրայ լեզուները բաժնուած
են հինգ խումբերու՝ ըստ անհետացման վտանգի աստիճանին: Անոնք են՝ Խոցելի, Յստակ վտանգի
տակ, Ուժեղ վտանգի տակ, Ծայրայեղ վտանգի տակ եւ Անհետացած լեզուներ: